Bálkur hrakfalla

2010-09-13T15:07:00.001+02:00

2010-09-13T15:02:00.001+02:00

2009-12-07T12:35:00.001+01:00

2009-11-09T20:23:00.003+01:00

Internetpungsdraslið virkar að sjálfsögðu ekki, svo enn sem áður sit ég á bókasafninu til þess að komast á netið. Ekki að það sé slæmt. Ég eeelska bókasafnið hérna!
Bókasafnið er inni í menningarhúsi Stavanger, ásamt barnasafni, listasafni, 2 kaffihúsum og bíói. Hér er ókeypis þráðlaust internet fyrir alla og nokkrar nettengdar tölvur. Bókasafnið sjálft er á 3 hæðum, á efstu hæð er barna- og unglingabókasafn, á 2. hæð er venjulegt bókasafn, frekar stórt, með öllum bókum sem manni dettur í hug. Þar er sérstök deild fyrir bækur á erlendum tungumálum og meirasegja nokkrar bækur á íslensku!!
Á jarðhæðinni er uppáhaldsdeildin mín, þarsem ég get setið löngum stundum. Kvikmynda- og tónlistardeildin. Þar er hægt að finna dvd, vhs og blue-ray myndir um allt á milli himins og jarðar, þúsundir geisladiska, bækur um tónlist og kvikmyndir og tímarit um sömu efni. Og svo, uppáhaldið mitt, nótur! Það er stórt nótnasafn, með nótum frá klassík til þungarokks og allt þar á milli og fyrir utan.
Á kvikmynda- og tónlistarbókasafninu eru líka nokkur hljóðfæri, gítarar, píanó, hljómborð og ukulele, svo eitthvað sé að nefna. Þessi hljóðfæri má maður bara taka eða setjast við og spila og syngja eins og maður vill. Sem getur verið bæði gott og slæmt, og er akkúrat kveikjan að pistli þessum...

Um daginn sat ég og var að sörfa á netinu þegar inn kemur drengur, kannski 17-18 ára. Hann heldur á gítar og sest í stól á móti mér og byrjar að spila. Hann náði engan veginn að ýta niður öllum strengjunum, svo það kom ekkert út sem hljómar eða tónar, eða annað sem tengist tónlist á nokkurn hátt. Ég get engan veginn varist brosi, lít aðeins í kringum mig og sé, mér til léttis, að aðrir á staðnum brosa líka út í annað. Drengurinn lifir sig þvílíkt inn í "tónlistina" sína og byrjar svo að syngja! Eitthvað sem hann hefði aldrei átt að gera, nema þá kannski í kjallaranum heima hjá sér. Þarsem munnurinn á mér er oft á undan heilanum að bregðast við, fer ég að hlæja og næ ekki að stoppa, svo ég enda á því að pakka tölvunni niður og flýja.
Og svo að góða parti sögunnar. Í dag kem ég inn á bókasafnið, til að nota netið og jafnvel finna mér nokkrar myndir að horfa á í vikunni. Stuttu eftir að ég er sest, koma inn stelpa og strákur á unglingsaldri og ná í einn gítarinn. Þau setjast svo hér rétt hjá mér og byrja að syngja og spila, og ég sver að ég er með tárin í augunum, þessi stelpa syngur svo vel!! Bara ókeypis yndislegir tónleikar á bókasafninu þessa stundina og ég tími varla að fara heim, þó ég eiginlega þurfi að fara að drífa mig...

Ég elska bókasafnið!

2009-09-28T20:47:00.002+02:00

Fattaði allt í einu að ég hef ekki bloggað í marga mánuði. Hef verið of upptekin á facebook eða eitthvað... Fór bloggrúnt áðan, og komst að því að fullt af fólki hefur skrifað eitt eða tvö blogg, síðan síðast er ég gáði, sem var mjög líklega í maí...

En eigum við að fara aðeins yfir hvað hefur gerst, shall we?!

2. júní lokaprófstónleikar. sem gengur bara ágætlega og í kjölfarið fékk ég 5 daga til að sýna pabba, systrunum mínum, Möggu frænku og Ólíver Dór, Stavanger og næsta nágrenni

14. júní var útskriftarathöfn í skólanum. Flestir mættu í galla- eða stuttbuxum, og við fengum afhentar möppur, með nafninu okkar á, skrifað með túss.Möppurnar voru næstum því tómar, fyrir utan einn miða sem stóð að við myndum fá pappírana senda heim með haustinu.

16. júní sumarfrí á Íslandi. Var að vinna á heilsuhælinu og hafði það gott, alein heima í Borgarhrauninu, pabbi austur í Breiðdal að veiða og Hrafnhildur í vist hjá Elísabetu. Eyddi ótrúlega miklum pening í strætókort :)

16. ágúst heim til Stavanger. byrjaði í skólanum stuttu seinna og líkar bara vel enn sem komið er. Er að læra kennslufræði og á klarinett, með es-klarinett sem aukahljóðfæri.

Síðan ég kom hefur verið ágætt veður og leiðinlegt veður, með rigningu og látum, en mest samt ágætis veður. Ég hef allavega ekki enn farið í stígvélunum í skólann, sem er merki um að það hefur ekki verið rigning þegar ég hef verið á leiðinni í skólann. Ég á það nefnilega til að klæða mig eftir veðri, þeas því veðri sem er akkúrat þá stundina sem ég er á leiðinni út úr dyrunum, án þess að hugsa um hvort það gæti rignt seinna. Því stend ég oft í dyrunum á skólanum á lopapeysunni og stari á rigninguna og óska þess að það stytti upp - sem þýðir yfirleitt að það rignir bara enn meira.

Ég hef enn ekki internet heima, ég reyndi um daginn og pantaði svona internetpung eins og það kallast á Íslandi, en auðvitað nær það drasl ekki sambandi í kjallaraíbúðinni minni. Svo núna kemst ég á internetið alls staðar í Noregi, þarsem er gsmsímasamband, nema heima hjá mér.. Mætti halda að ég byggi innst inní Guðbrandsdalnum en ekki í miðbæ Stavanger, hvað er gsm símasamband varðar.

ég hef ekki meira um það að segja. Adíós seríós

2009-05-13T10:55:00.002+02:00

Ohh, stundum væri ég alveg til í að spila á hljóðfæri sem er ekki gert úr tré...

Eftir ferðina til Kristiansand, tók ég eftir því að sprungan á klarinettinu mínu (sem var límd saman fyrir 3 árum og var ekki sjáanleg eftir það) var farin að sjást. Síðan þá hefur hún bara opnast meir og meir, svo ég þarf að láta laga hana.

Það er á svona stundum sem ég vil leggst á hnén, horfi til himins og segi: "are you fokkings kidding me??!"

2009-05-12T13:01:00.003+02:00

Ég er búin í skólanum!!
Eða þeas með allt svona skólaskóla, skilaði ritgerð í eina bóklega faginu sem ég var í í vetur í gær. Er eiginlega illt í puttunum eftir allt pikkið.

Næstu 3 vikur munu svo einkennast af spileríi, kammertónlistarprófið mitt 20. maí, spila á prófinu hjá Ragne Marthe 28. maí og svo eru litlir tónleikar 2. júní, sem munu marka stór skil í mínu lífi (ef ég næ, þeas), þá hef ég lokið háskólaprófi, eitthvað sem mér finnst vera allt of fullorðið fyrir mig :)
Get eiginlega ekki annað sagt en að mig hlakki gífurlega til næstu vikna, bara að spila og spila og spila og spila og vonandi fer hitastigið að hækka, þannig að það sé aksjúelt að fara á ströndina.

Er að fara að kenna á morgun í Egersund, sem er ca klukkutíma í burtu frá Stavanger með lest. Er að kenna fyrir eina úr lúðrasveitinni, hún er að fara til Ameríku á morgun. Sagði já áður en ég vissi að þetta væri í Egersund og fékk vægt sjokk þegar hún sagði að þetta væru 15 nemendur, stórir og litlir...

Svo er lúðrasveitaræfing á fimmtudaginn hjá Konsenkorpset, lúðrasveit skólans míns. Við komum saman einu sinni á ári og spilum yfir nokkra marsa og marserum svo í Folketoget á 17. maí. Ég fæ líklegast að vera sólóklarinett þetta árið, allir hinir eru annaðhvort í Ameríku eða of feitir til að marsera.

annars já, er lítið að frétta, bara sól og sumar og regnbogar og einhyrningar...svona eins og venjulega

2009-05-04T17:03:00.003+02:00

jæja, ætli það sé ekki kominn tími á að skrifa eitthvað...
Vorið er að breytast í sumar, allt orðið þvílíkt grænt og blómstrandi, flest tré hér í útlandinu blómstra á vorin með hvítum, bleikum og gulum blómum :)

ég er tæknilega séð í prófi akkúrat núna, heimapróf í musikkestetikk (sem ég er búin að komast að heitir tónlistarfagurfræði á íslensku!!), þarf að skrifa verkefni um autonomiestetikk, eða valdi það, virtist vera auðveldasta verkefnið.

annars er brjálað að gera hjá mér ca næstu 2 vikurnar. Einn óbóleikari hér í skólanum ákvað að nenna ekki að bíða í nokkra daga eftir prófið sitt til að spila með öðrum á kammertónlistarprófi og fara heim áður en kt.prófin er. Þarmeð setti hún 4 aðra á hausinn með prógram, svo að nú þarf ég (í staðinn fyrir að þurfa að æfa 1 tríó (sem er nánast klárt) og 2 konserta) að æfa upp 2 tríó, 2 konserta og 1 kvartett á 2 vikum...plús að æfa prófverkin mín, gera estetikkverkefnið og æfa mig fyrir klarinett tónleika 11. maí...pjúff!

Núna um síðustu helgi var æfingahelgi og konsert með Rogalands Blåsensemble, sem er ný lúðrasveit (svipuð uppsett og Blásarasveit Reykjavíkur). Vorum á 6 klukkutíma æfingum föstudag og laugardag, 2 tímar á sunnudag og svo tónleikar. Var svo búin bæði fös og lau, en einhvern veginn tókst þetta allt saman og tónleikarnir voru bara mjög góðir, alltaf sorglegt samt þegar eru fleiri hljóðfæraleikarar að spila, en fólk að hlusta ;) Við vorum með þvílíkt góðan stjórnanda, Rune eitthvað, sem var líka svo skemmtilegur og fyndinn :)
Svo kom alveg klassískt klarinettmóment á sunnudagsæfingunni, þegar stelpan við hliðina á mér gat allt í einu ekki spilað nema 5 efstu nóturnar. Skoðaði hljóðfærið hennar og ein fjöðrin var brotin, svo að einn takkinn var bara opinn og auðvitað er þetta mikilvægur og mikið notaður takki, svo það var ekki möguleiki á að líma hann niður. Svo það endaði með að Tone keyrði heim og náði í sitt klarinett til að lána henni :)

En jæja, ætli ég fari ekki að koma mér heim að vinna eitthvað í þessu verkefni...

2009-04-29T15:35:00.009+02:00

Hef ég einhvern tíma minnst á að ég elska vorið!
svo við tölum ekki um blóm og tré og blómstrandi tré :)

2009-04-17T16:24:00.006+02:00

Hef absólúttlí ekkert að tjá mig um, svo ég ætla bara að setja inn nokkrar myndir af vorinu sem ríkir hér þessa dagana :)

Svanirnir löguðu til hreiðrið niðrí bæ

2009-04-06T16:06:00.002+02:00

Ég keypti sjónvarp á föstudaginn. Sem er æðislegt, því ég eeeelska að horfa á sjónvarp. Kom sjálfri mér þó á óvart með að ég hef alveg gert það sem ég ætlaði að gera, en ekki legið heima og horft á sjónvarp. Og hvað skyldi vera besta uppgötvunin?! Jú, Tine er með nýja "no milk today" auglýsingu :D

2009-04-01T19:57:00.002+02:00

Þá er (loooooksins) búið að ákveða dagsetningu fyrir útskriftartónleikana mína í vor.

2. júní kl 17.30

Allir eru meira en lítið velkomnir!!!
Er búin að leggja inn pöntun hjá veðurguðunum um brjálaða sól og gott veður vikuna á eftir, bara svona til að gera dílinn enn betri...

Annars sit ég núna á bókasafninu, eða reyndar fyrir utan bókasafnið (en inni í menningarhúsinu) og sörfa á netinu. Komst nefnilega að því að hér er ekki lokað fyrir niðurhal (ekki að ég ætli að viðurkenna að ég stundi það, enda með öllu óheimilt og siðlaust) og er líka svona líka sterkt net (eða stórt eða eitthvað) að það tekur innan við klukkutíma að ná í sjónvarpsþátt (aftur, ég viðurkenni samt ekki að iðka það sjálf)

Annars er lítið í fréttum, lítur út fyrir að ég fái nóga vinnu í maí, þegar lúðrasveitin mín fer til USA og ég verð eftir heima. Flest þeirra sem eru að kenna og fara með, hafa beðið mig um að kenna fyrir sig á meðan og þar sem ég hef aldrei lært almennilega notkun orðsins nei, þá lítur út fyrir að ég þéni allnokkuð á þessum 2 vikum :)

Vorið, sem byrjaði með trukki og dýfu fyrir ca 2 vikum, er ekkert að flýta sér, það er ennþá kalt (svona flíspeysukalt) og ekkert voðalega fínt rigningarlega séð, alltaf skýjað og svoleiðis Og gvöð, hvað ég vona að það breytist bráðum, er orðin nett leið á rigningunni...

En á morgun er ég er að fara að fjárfesta í sjónvarpi, notuðu sony 32" stykki, svo þá má rigna eins mikið og hægt er, allavega á meðan ég er inn, sömu reglur og áður gilda að sjálfsögðu á meðan ég er utandyra...

En stjúpid, stjúpid ég gleymdi hleðslutækinu, svo ég er víst óver and át, for ná...

2009-03-30T14:05:00.002+02:00

Á síðustu 2 dögum hef ég spilað fyrir rúmlega 700 manns. Á 2 tónleikum, þeim fyrri í Kristiansand á laugardagskvöld og seinni í Orstad, seinnipart sunnudags.

Í stuttu máli var helgin svona:
rúta, æfing, skipta um föt, tónleikar, borða, sofa.
vakna, rúta, æfing, borða, æfing, skipta um föt, tónleikar, rúta, sofa.

Fyrir utan mig voru um 20 hljóðfæraleikarar og 60 sannkristið kórfólk. Eftir helgina hef ég komist að því að sannkristið fólk fær ansi mörg móment, þar sem allt verður skýrt og þau annaðhvort finna trúna á Jesú á ný, finna "hið lifandi vatn", eða bara finna nálægðina við Guð. Sannkristnu fólki finnst líka afskaplega gaman og mikilvægt að lýsa þessum mómentum og tala um þau.
Held ég hafi allavega heyrt nóg af svona sögum fyrir lífsstíð...

Framundan er víst páskafrí. Ég ætla ekki að fara neitt, býst fastlega við því að eyða mestum tíma í æfingaherbergjum skólans og svo fyrir framan sjónvarp sem ég verð vonandi búin að kaupa þegar páskafríið hefst :)

2009-03-24T11:36:00.003+01:00

Þar sem 2008 er liðið, er Stavanger ekki lengur Menningarborg Evrópu og öll skiltin tekin niður. Og hvað verður um skiltin?! Jú þau eru, að sjálfsögðu, geymd á bílastæði fyrir aftan einhverja umboðsmannaskrifstofu, í miðju engustaðar, sem er sama hverfi og ég keypti hjólið mitt (og var með það í viðgerð um daginn, þar sem ég labbaði fram á þau) ...

2009-03-12T20:12:00.008+01:00

Fyrir þrem vikum var umhverfi skólans svona:

Núna er svona farið að gægjast út úr trjám og uppúr grasi og mold:

Æ, hvað það er stundum yndislegt að búa í útlöndum :)

2009-03-06T21:43:00.007+01:00

Fallegt ljód fyrir alla sem hafa einhvern tímann spilad á hljódfæri og kannast vid hljódid af mørgum fótum sem stappa næstum tví samtímis í gólfid :)

UNTIL I SAW YOUR FOOT...

I thought this music was in four,
Until I saw your foot.
But now I think it must be three
Or maybe five, I can't quite see.
Or six? Or maybe not.
I thought this piece was rather slow,
Until I saw your foot.
But now I think it's double speed.
Sometimes it's very fast indeed--
And other times it's not.

I thought conductors gave the beat,
Until I saw your foot.
But now I think it rather neat
To look at all the tapping feet
And choose the speed that I prefer,
And play along with him -- or her.
I find it helps a lot.

I thought my timing was all wrong,
Until I saw your foot.
Conductors beat both east and west,
But we don't play with all the rest;
We've found a tempo of our own,
And bar by bar, our love has grown.
Oh, I was feeling so alone,
Until I saw your foot.

2009-03-02T14:25:00.004+01:00

Og svo allt í einu var komið vor!

Ég sver, þegar ég kom út í morgun (sem þýðir um hádegisleytið á mínum tíma), þá var, mjög svo skyndilega, komið vor. Það eru sprottnir upp vorlaukar í garðinum og hitastigið er ekki lengur drulluskítkalt, heldur meira bara svalt. Vorið kemur sko með trukk og dýfu þetta árið...

Það er nokkuð áhugavert andrúmsloftið í skólanum þessa dagana. Það er prufuspilsvika, sem þýðir að okkur sem erum í skólanum, er úthýst og í staðinn er húsið fyllt af krökkum sem vilja komast í skólann. Þetta þýðir að úr hverju andliti hér, skín nú stress og áhyggjur, ég hef sjaldan séð jafn marga alvarlega svipi saman komna á einum stað ;)

Af því að ég fylgist alltaf svo illa með, þá hef ég verið óvart í fríi í næstum 2 vikur. Í síðustu viku hitti það bara þannig á, að öllum tímum, nema klarinetttímanum, var aflýst og svo var vetrarfrí í lúðrasveitinni, þannig að ég var í fríi þriðjudag til sunnudags. Svo er prufuspilsvika í skólanum, svo tæknilega séð eigum við ekki að vera í neinum tímum, en Håkon (klarinettkennarinn minn) hlustar aldrei á þannig og fæ ég því bæði spilatíma og kammertíma, auk þess að kenna bæði fimmtudag og föstudag, fimmtudag fyrir mig og föstudag fyrir Tone, sem er að prufuspila fyrir mastersnám, á meðan hún á að vera að kenna.

En jæja, ég er í alvörunni að vinna verkefni fyrir musikkestetikk, svo ég ætti að koma mér aftur að því...

2009-02-04T20:05:00.003+01:00

Suma daga ætti ég alls ekkert að fara á fætur... Þegar maður setur saman mína heppni og lélegt skyn fyrir góðum hugmyndum, þá er útkoman sko ekki í plús!

ónei nr 1: Kom út og allt var hvítt. Það þýddi að ég gat ekki hjólað, heldur þurfti ég að labba. Það þýddi að það tæki 2/3 lengri tíma að komast niðrí skóla.

ónei nr 2: Þurfti að fara til Tjensvoll, taka strætó þangað og tilbaka niðrí bæ, en missti að sjálfsögðu af strætó til baka, svo það var annaðhvort að bíða í hálftíma, eða labba niður bröttustu brekku í Stavanger og ná strætó þar.
Ég valdi að labba niður brekkuna. Flaug þrisvar á hausinn.

ónei nr 3: Náði strætó og komst að því að strætókortið mitt var tómt af peningum. Akkúrat núna. Hefði ég beðið uppfrá hefði ég bara þurft að labba yfir götuna í hraðbanka, en þar sem ég labbaði niðreftir, þurfti ég annaðhvort að labba upp brekkuna aftur, eða labba, í slabbi, á næstu bensínstöð, ca 10 mín í burtu, til að taka út pening. Þar sem brekkan er líklegast enn sleipari uppávið en niðurávið, þá valdi ég að labba á bensínstöðina.

ónei nr 4: Kom í strætó, eftir að hafa tekið út pening hjá dónalegasta Norðmanni sem ég hef á ævinni hitt, og komst að því að það er ekki lengur hægt að fylla á strætókortin hjá bílstjórunum. Frábært. Sem þýðir að ég þarf að fara á skrifstofuna á morgun, sem þýðir að ég þarf að borga fullt gjald í strætó allan morgundaginn, eina dag vikunnar sem ég yfirleitt tek strætó.

ónei nr 5: Labbaði frá miðbænum niðrí skóla, í gegnum Gamla Stavanger (myndin er tekin þar) og flaug á hausinn í 4ða skipti í dag. Fyrir framan fuuullt af fólki. Alveg svona listaflug, fætur beyglaðir í allar áttir og hendurnar út um allt. Auk þess tók þetta fáránlega langan tíma, að komast alveg niðrá hnén.

Núna er ég hálfhrædd við að fara að æfa mig, er viss um að ég eigi eftir að missa klarinettið í gólfið og brjóta það, það myndi sko algerlega setja punktinn yfir i dagsins...!

2009-01-27T22:24:00.001+01:00

Bara í Noregi....

Eru gerðar bíómyndir um krakka í lúðrasveit. Og sjónvarpsþættir um krakka í lúðrasveit..

2009-01-27T15:12:00.002+01:00

Ohh, það er svo pirrandi að hafa ekki internet heima hjá sér, ég man aldrei hvað ég ætlaði að gera á netinu, þegar ég loksins kemt í samband. Samt gott líka, hef sjaldan gert eins mikið heima og síðustu vikur. Opnaði meirasegja musikkestetikk bókina á sunnudagskvöld. Var reyndar fljót að loka henni aftur, en hey, plús fyrir viðleitni?!

Átti svo alvarlega fullorðinslegan dag í gær. Eftir að hafa hangið í skólanum leengi (það var ógeðslega kalt í gær og ég var bara ekki að nenna út), kom ég við í Elkjøp á leiðinni heim og keypti ryksugu! Já, ég keypti fullorðins-heimilistæki! Reyndar það allra ódýrasta í búðinni, en meina, það er ekki eins og íbúðin mín sé stór, svo ég efast um að ég þurfi einhverja ryksugu sem kostar meira en 300 kr (norskar kr, ekki íslenskar).
Þegar ég kom heim, eldaði ég svo mat! Og það var ekki Fjordland (norska 1944) eða Grandiosa (frosin pizza), notaði efni úr nokkrum pokum og boxum og notaði bæði ofn og hellu.
Þegar öllu þessu var lokið fannst mér ég svo hrikalega fullorðin að ég fann fram Jón Odd og Jón Bjarna myndina, svona til að vægja upp á móti öllu fullorðinsdótinu. Það er nú alltaf jafn skemmtileg mynd :)

2009-01-21T21:24:00.002+01:00

Ég hef svo lítið að segja að það er bara sorglegt. Eyði mestum tíma í æfingaherbergjum skólans, hef tekið ástfóstri við nýja munnstykkið og er á síðustu stigum þess að spila inn nýja klarinettið svo ég get farið að æfa mig að ráði á það.
Svo þegar ég er ekki að æfa mig, þá er ég ca hálfnuð með síðustu Twilight bókina, Breaking Dawn. Get samt ekki lesið meira en tvo daga í röð, annars næ ég ekki að hugsa um neitt annað en það sem er að gerast í bókinni, svo ég tek alltaf 1-2 daga pásur á 2ja daga fresti...
Svo keypti ég Nonna og Manna í fríhöfninni á leiðinni út. Var samt pínu efins, að ég myndi skemma nostalgíuna, en það var sko alger óþarfi. Það sem þessir þættir eru yndislegir!

Svo fékk ég virðisaukapeninginn tilbaka fyrir klarinettið (varð heldur betur hissa!) og er að hugsa um að fagna því með því að kaupa mér ryksugu og rafmagnsofn. Það finnst mér líka sorglegt, að mig langi mest af öllu í ryksugu og rafmagnsofn. Eldist um ca 20 ár við þessa ósk...

Annars er vorönnin að komast í ljós þessa dagana, ætla að halda áfram í lúðrasveitinni, þó mér finnist hún vera svolítið mikið peningaplokk (erum að fá nýja búninga og þurfum að borga fokkings 1000 kr fyrir þá, sem við fáum svo tilbaka þegar við hættum), en það er of gaman að spila á saxafóninn til að ég geti hætt og skilað honum. Nú lítur líka út fyrir að ég þurfi að fara að æfa mig til að geta spilað stöffið almennilega, sem gerir það enn skemmtilegra ;)
Svo ætla ég að spila í klarinettukórnum í Sandnes. Það er meira út af öfundsýki en nokkru öðru. Varð svo öfundsjúk þegar ég hlustaði á tónleikana þeirra fyrir jólin, gat varla notið tónleikanna almennilega því mig langaði svo að spila með...

En tölvan verður brátt batteríslaus, svo síja

2009-01-19T22:03:00.000+01:00

Ó, ég væri svo til í að fá að prufa þetta píanó!

http://mbl.is/mm/folk/frettir/2009/01/19/barnasafn_i_filadelfiu_fekk_fraegt_risapiano_gefins/

2009-01-11T21:40:00.003+01:00

Er komin til Stavanger, með smá stoppi í London, svona í leiðinni.
Það var gaman í London.
Ég skoðaði ekki Big Ben, Westminster Abbey, Tower of London, Madame Tussaud eða eitt einasta safn. Ég fór heldur ekki á neina leiksýningu og framdi þar með glæp að mati flestra.
En hinsvegar, þá keypti ég mér skínandi nýtt og fallegt klarinett, sem virkar með eindæmum vel, fallegt nýtt handsmíðað munnstykki sem er fáránlega gott. Ég keypti allar Twilight bækurnar, 2 geisladiska og 2 dvd diska, fyrir utan Nonna og Manna, sem ég keypti í fríhöfninni.
Ég labbaði í gegnum Hyde Park og rölti í kringum Piccadilly Circus, borðaði Ben&Jerry's ís og fór svo í bíó á Leicester Square þegar ég var alveg að gefast upp á röltinu.
Svo mætti ég Ben Stiller á Marylebone Road.
Allt þetta gekk með eindæmum hrakfallalaust fyrir sig. En svo kom að heimferð.

Ég þurfti að tékka mig út af hótelinu kl 12 og hafði því ekkert að gera til 5, sem ég áætlaði nógan tíma til að komast á flugvöllinn. Svo ég fór út að labba, búin að kemba Oxford Street og þar í kring og langaði eiginlega ekkert að versla meira. Tók lest til Piccadilly Circus og labbaði þar í kring. Þar er sko fullt af bíóum og endaði ég inni í einu þeirra. Á myndinni Twilight. Sem var í þriðja skipti sem eg sá téða mynd.
Samt tímdi ég ekki að fara út fyrr en myndin var búin og var því soldið sein af stað á flugvöllinn. Var með bakpoka, klarinetttöskuna, eina litla á hjólum og eina stóra á hjólum. Komst að því að það er ekkert auðvelt að taka svona mikinn farangur í neðanjarðarlest, sérstaklega ekki kl 17.30 á föstudegi.
Komst að lokum á lestarstöðina. Sem var stór. Það var alls ekki hlaupið að því að finna rétta lest, en að lokum (eftir tæpan hálftíma) tókst mér að finna lestina og sporið. Var komin inn og búin að raða töskunum og setjast, þegar ég ákvað að líta á bæklinginn og komst að því að akkúrat þessi lest var víst hraðlest til Brighton og stoppaði því ekkert á Gatwick. Svo ég flýtti mér út og aftur inn í stóra salinn, endaði svo í Gatwick flugvallarlestinni og komst á flugvöllinn, með tvo lestarmiða í vasanum, því auðvitað þurfti ég að kaupa nýjan miða í flugvallarlestina.
Ætlaði að gera virðisaukadæmið áður en ég tékkaði mig inn, en þar var lokað vegna manneklu, svo ég þurfti að tékka mig inn fyrst, fara í gegnum sekjúrití og skila svo umslaginu, ólokuðu, í eitthvað box og einhver myndi stimpla það og senda til baka. Verður kraftaverk ef peningurinn skilar sér inn á reikninginn minn...
Komst loks inn í fríhöfnina, keypti mér vatn og fór að hliðinu. Var rétt sest þegar opnað var inn í vélina, svo ég stóð upp aftur og inn, settist þar niður, opnaði New Moon (bók nr 2 í Twilight Saga) og næsta sem ég vissi var að vélin skall á flugvellinum í Stavanger. Missti af síðustu rútunni til Stavanger og endaði í leigubíl alla leiðina heim.

Vaknaði svo á laugardag með verki allsstaðar, í öxlunum, upp-og framhandleggjum, úlnliðum og fingrum eftir töskuber. Marbletti á báðum lærunum að aftan, því töskurnar voru alltaf að rekast í mig þegar ég labbaði. Með verki í mjöðmunum, því ég labbaði svo skakkt til þess að töskurnar væru ekki alltaf að rekast í mig og í hnjánum eftir allt labbið upp og niður stigana í neðanjarðarlestinni.

Er voðalega glöð núna að ég þarf ekki að ferðast neitt fyrr en í mars og þá í mesta lagi með lest eða rútu...

2009-01-05T01:49:00.000+01:00

Ætlaði eiginlega ekkert að nenna að skrifa svona áramótablogg, aðallega af því að ég fékk gullfiskaheila við fæðingu og á erfitt með að muna það sem gerðist í nóvember og ekki séns að ég gæti munað eitthvað frá því á síðasta skólaári! En ég skipti um skoðun og fór yfir bloggið mitt allt síðasta ár. Komst að því að það hefur bara eiginlega ekkert merkilegt skeð allt þetta ár, svo ég ætla bara að skrifa um eitthvað ómerkilegt :)

Í fyrsta mánuði ársins dró helst til tíðinda að ég missti næstum því af fluginu frá Osló til Stavanger. Gleymdi að stilla klukkuna á norskan tíma…

Febrúar fór betur. Fann mér voða fínan kjól á 70 norskar krónur, spilaði í honum á Shellpris tónleikunum með hljómsveit skólans, tónleikar sem gengu með yfirburðum vel.

Í mars fór ég á þjóðlagatónlistarnámskeið í Voss, uppgötvaði þar að mér finnst þjóðlagatónlist æði og ákvað í framhaldið að mig langar að búa í Færeyjum í smátíma. Svo átti ég afmæli og ég fékk stafrænt sjónvarp, elskaði það alveg þartil í haust, því ég var samningsbundin og án sjónvarps og þarf því að borga helvítis draslið þar til í mars án þess að nota það…

Í apríl skrapp ég til Íslands, óvænt fyrir alla nema pabba og Hrafnhildi. Fór á árshátíð LV og sundmót hjá Hrafnhildi og eitthvað fleira. Svo komst ég að því að hjólið mitt, tæplega 1 og ½ árs gamalt, var ryðgað í klessu og borgaði sig ekki að gera við það.

Í byrjun maí kom sumarið, en fór mjög fljótt aftur. Seinni hluti mánaðarins snerist um bongóblíðu, drauma um strandferðir og bölv yfir öllum prófunum sem ég þurfti að læra fyrir í stað þess að fara á ströndina. Nema í bláendann þegar jarðskjálfti hvolfdi Hveragerði næstum því, þá leitaði hugurinn ansi mikið heim.

Í júní kom ég aftur heim til Íslands, fór að vinna á Hælinu og átti eflaust fyndnasta samtal ársins. Það var við hjúkku nokkra:
Hjúkka: Já…og þú verður hér í sumar? (átti við læknamóttökuna)
Ég: Jámm.
Hjúkka: Og hva, þú ert bara næstum því fullorðin?
(Ég: Ekkert svar)
Húkka: Hvað ertu eiginlega gömul?
Ég: Öööö…26 ára.
Hjúkka: Nú?! Ji, þú ert svo smábarnaleg!
Ég: Ömm, ok…

Júlí einkenndist af skátun, undirbúningi fyrir landsmót og svo landsmótið sjálft. Heil vika á Akureyri, í betra veðri en nokkur gæti ímyndað sér og með skemmtilegasta hóp af krökkum sem ég hef kynnst.

Í ágúst tók ég mér sumarfrí í fyrsta sinn í langan tíma, skrapp vestur í Hörgshlíð ásamt familíunni, fór að veiða upp á vatni og við röltum upp að Myllufossi og fleira. Góðir tímar.
Fór svo út til Noregs í endann, flutti út úr Draumkvæðastíg og inn í skrifstofu á háskólasvæðinu. Týndi lyklunum að bílaleigubílnum, nokkuð sem kostaði mig mikið hugarangur og hellings pening.
Í september byrjaði ég fyrir alvöru í skólanum, byrjaði loksins í lúðrasveit, fékk trompetinn minn (þennan fjólubláa), uppgötvaði að Tverrfaglig Prosjekt væri yfirmáta leiðinlegt og tímafrekt verkefni og spilaði á óperuhátíð með algerlega óhæfum stjórnanda.

Október snerist að miklu leyti um kreppu, áhyggjur af peningum, námslánum og svoleiðis. Fór í útvarpsviðtal og fékk án efa fyndnustu spurningu ársins í einni af útskýringarumræðunum um hugsanlegt gjaldþrot Íslands:
“En af hverju reddar Danmörk ykkur ekki? Þið heyrið jú undir Danmörk!”
Í sama mánuði sá ég Martin Fröst á tónleikum, klárlega einn af hápunktum ársins. Ég varð líka fræg, eða fór allavega í útvarpsviðtal og svo skrapp ég til Íslands.

Nóvember einkenndist af rigningu. Ég tók eitthvað hryllingsmyndakast og horfði á helling af misógeðslegum hryllingsmyndum.
Ég gafst upp á að vera alvöru Íslendingur og keypti mér stígvél. Næstu þrjá daga á eftir kom ekki dropi úr lofti, eða ekki fyrr en systir mín steig fæti sínum á Stavangerska jörð. Þá daga hellirigndi.
Síðustu vikuna vaknaði ég fyrir allar aldir til að sýna grunnskólasýninguna í afskekktustu skólu Rogaland, með tilheyrandi löööngum bílferðum og ógurlega mikilli þreytu.

Í desember gat ég loksins haft áhyggjur af yfirvofandi klarinettprófi og skilum á musikkestetikk ritgerðum. Hafði bæði af, setti met í ritgerðaskrifahraða, 6 klukkutímar gjössovel. Mæli samt alls alls ekki með því, hef næstum meiri áhyggjur af því þegar ég fæ ritgerðina tilbaka…
Fór líka í ferðalag, sem klárlega verður ritað í bækur sem eitt það versta. Skagar hátt upp í ferðalag dauðans ‘05 þegar flugvélin týndist og ég hljóp fram og tilbaka á Kastrup í 10 klukkutíma. Tók lestina til Osló og auðvitað olli rafmagnsleysi fyrir utan Stavanger það mikilli seinkun að tvísýnt var hvort ég næði fluginu. En það hafðist og við tók hringflug um Skandinavíu sem að lokum skilaði mér til Keflavíkur.
Jólin mín voru góð, fékk samt fullt af veikjum, gubbupest, flensu og kvef. Náði mér nokkurn veginn á strik og fékk svo aftur kvef.
Áramótin voru líka skemmtileg, skaupið var örugglega allt í lagi, mér fannst það allavega fyndið, en minnið mitt (eða öllu heldur skortur á minni) sameinað með búsetu í öðru landi gerir það að verkum að ég veit sjaldnast hverju er verið að gera grín að.

Við blasir svo nýtt ár, veit voða lítið um hvað ég mun hafa fyrir stafni, þó nokkrir hlutir séu nú þegar niðurnjörfaðir. Fyrst ber að nefna ferð til London, sem hefst nú á miðvikudaginn. Þar verður hápunkturinn klárlega heimsókn til Howarth of London, þar sem ég ætla að festa kaup á A-klarinetti og nýju munnstykki, úrvalið hjá þeim af munnstykkjum er alveg til að deyja fyrir. Hitt sem mig hlakkar til er Oxford Street, en þar er víst húdsj bókabúð og tónlistarbúð, hef ekki gert fleiri plön, býst við því að þetta þrennt taki mestan partinn af deginum...
Næst á eftir er endurtekning á Befriad söngleiknum, í Kristiansand og svo bachelortónleikar í vor.

2008-12-24T01:11:00.002+01:00

Búin að gera margt síðan síðast.
Búin að sjá Twilight. Elskana.
Búin að sjá Four Christmases líka. Elska hana ekki eins mikið.
Búin að versla allar jólagjafir. Sem betur fer, því jólin eru jú á morgun.
Búin að fá hrikalega gubbupest. Rifjaði upp fyrir mér hversu mikið ég HATA að fá gubbupest.
Bún að fá kvef og flensu. Alveg svo hressilega að ég fann vart lyktina af skötunni.
Búin að gera pabba minn hálfbrjálaðan á liggísófahálfmeðvitundarlaus-aumingjaskap.
Búin að borða 5 stk ristað brauð, 1/2 skál af kókópöffs og 3 pizzusneiðar síðan á laugardag. Hef smá áhyggjur að koma ekki miklu niður af jólamatnum.

Og hvað er svo framundan?
Nú, jólin.

2008-12-20T23:08:00.003+01:00

Indælt :)

2008-12-18T03:02:00.002+01:00

Æfði mig í flugi í dag. Niður manndrápssleipu tröppurnar hjá Elísabetu. Kom alveg furðulega ósködduð frá þessari æfingu, með smá kúlu á hnakkanum, en annars bara finn ég ekkert til!

Er semsagt komin heim, tók alveg heljarinnar ævintýrisferðalag, þar sem ég prufaði flestar gerðir almenningsfarartækja. Byrjaði á því að setjast upp í lest í Stavanger. Áður en við lögðum af stað var okkur tilkynnt að rafmagnslaust væri á milli tveggja staða svolítinn spotta fyrir utan bæinn. Svo það áttu að koma rútur til að keyra okkur framhjá rafmagnsleysinu. Það tók heljarinnar tíma fyrir rúturnar að koma og svo annað eins að keyra til Siri, þar sem beið lest nokkur. Sú lest fór bara til Kristiansand og þurftum við að bíða í tæpan klukkutíma eftir næturlestinni frá Osló. Þar var svo bíttað á lestum og brunað til Osló. Ég verð að viðurkenna að ég var nokkuð viss um að ég myndi missa af fluginu, enda var seinkunin tæpir 3 tímar þegar við komum til Kristiansand. En þegar við komum til Osló hafði lestarstjórinn aldeilis gefið í og seinkunin var bara 50 mín. Ég fékk svo far með hraðlestinni á flugvöllin og hafði góðan tíma í fríhöfninni. Til að gera ekki neitt.
Hoppaði svo í vélina, þegar hún loksins kom og, eftir smá útsýnisflug um Skandinavíu (Oslóar og Stokkhólmsflugunum var slegið saman) og talsverða bið á Arlanda, kom ég loks til Íslands.

Hef svo eytt síðustu dögum í ritgerðasmíðar, setti persónulegt met í ritgerðarsmíðahraða (eitthvað sem ég mæli ekki með), byrjaði á seinni ritgerðinni um 23.30 í gærkvöldi og kláraði rétt fyrir 6 í morgun! Báðar þessar ritgerðir fjalla um heimspeki í tónlist og þar sem ég er afskaplega lítið heimspekilega þenkjandi manneskja og hef gífurlega lítinn skilning á efninu vegna tungumálaörðugleika, þá tel ég mig heppna fái ég D...

2008-12-11T20:05:00.002+01:00

Sjitt, hvað það er hægt að gera margt í staðinn fyrr að skrifa ritgerð. Alveg magnað!

Annars bíð ég þessa dagana eftir að bankað verði upp á hjá mér og mér gefið meistarabréf. Sem meistari í göngu á ís. Í æfingunum hef ég snúið flest liðamót fyrir neðan mitti.

En svona án gríns, þá er svo hált hérna þessa dagana að það er ekki fyndið. Ég bý uppi á hól (ekki samt svo stórum og síðasta) og það er bara svell alveg niður í bæ. Og svo líka fyrir framan skólann. Og hálkublettir annars staðar.
Ef það væri ekki svo ótrúlega gamalmennalegt væri ég búin að fá mér svona brodda undir skóna…

2008-12-08T23:17:00.002+01:00

Held ég komi aldrei fleiru í verk, en þegar ég á að vera að læra... Á að vera að skrifa musikkestetikk ritgerð(ir) og núna um helgina er ég búin að hlusta á geðveikt mikið af tónlist, fara á tónleika klarinettkórsins í Sandnes og orðið ástfangin af es-klarinetti (aftur), byrja í tímum á það einhvern tíma í febrúar :) fór líka út að borða með þeim eftir tónleikana og sat til borðs með, ekki einum heldur tveimur frönskum klarinettleikurum og jehesús, það var frábært. Alveg svona "being in the presence of greatness" frábært :)
Sá svo lokahátíð Stavanger 2008, eða sko ekki allt, bara hápunktinn, var geggjað flott :)
en skólinn lokar eftir 8 mín og tölvan verður batteríslaus eftir 5, svo ég er farin, nenni ekki að setja þjófavörnina af stað...

2008-12-07T23:40:00.002+01:00

Ef þetta er ekki bara fallegasta atriði í bíómynd...ever
(sorrý, nenni að laga það svo það passi...)

2008-12-05T13:11:00.003+01:00

Einn nemandinn minn hefur eitthvað frétt af fjármálakrísunni á Íslandi og spurði mig í gær hvernig gengi á Íslandi. Ég útskýrði fyrir honum að þetta væri nú ekki eins alvarlegt eins og fjölmiðlar hér segja (allur matur í búðum að klárast osfrv.), sagði að fólk þyrfti bara að fara að spara peningana sína.
Svo spurði hann: "en hvernig verður það með jólin? Ætlið þið samt að halda upp á þau?"
Ég átti bágt með að hlægja ekki, og sagði honum að ástandið yrði að verða töluvert mikið verra til þess að fólk myndi hætta við jólin :)

2008-12-02T15:55:00.002+01:00

Ojæja, enn eina ferdina liggur internetid nidri heima. Ég hef svosem ekkert ad segja, vildi bara segja ad ég er enn á lífi, trátt fyrir kuldakast sídustu viku. Búin med leidinlega verkefnid og hef skyndilega allan tímann í heiminum til tess ad æfa mig :) Var ad reyna ad finna tíma fyrir tríóæfingu og ég var bara laus alltaf!
Tónleikarnir gengu flestir vel, krakkarnir hlógu og tá var nú takmarkinu nád ad mínu mati. Jú, nema sídasta sýningin, hún fór algerlega til helvítis (sver ad ég flissa bara tegar ég hugsa um tad, hún gekk svo fáránlega illa!), vid nádum ekki einu sinni ad klára eitt stykkid (sem snerist um ad slá med gaffli og hníf í bord, diska og skálar og reyna ad brjóta sem mest. Í takt.) tví vid hlógum svo mikid ad vitleysunum sem vid gerdum...
Héldum svo upp á ad vid tyrftum aldrei ad gera svona aftur med pizzu, køku, súkkuladibúding og ís heima hjá hinni stelpunni í grúppunni (sem er aaadeins meiri húsmódir en ég og var búin ad baka køkuna sjálf, búa til búdinginn og bjó svo til pizzuna) Og spiludum Super Mario Bros á alvøru gamaldags Nintendo tølvu :D

2008-11-27T20:13:00.003+01:00

7 af 9. 16, 12 og 11.

Tel mig hafa unnið til afreka í dag, þegar ég kenndi 4 krökkum samtímis að setja saman, taka sundur og blása í klarinett. Og öllum 4 tókst að fá nokkuð fínt hljóð í rörið. Svo kenndi ég 9 stelpum að spila Jingle Bells utanbókar. Líka samtímis. Býst fastlega við því að stjórnarndinn hafi verið ofboðslega ánægður eftir pásuna, með 9 stykki stelpur spilandi Jingle Bells, mjög líklega nonstop :)

Annars hefur dagurinn verið laaangur. Vaknaði um 6.30 (já, ég er að segja satt!) og var mætt fyrst af öllum í ferjuna (jú, er aftur að segja satt!). Spiluðum 2 sýningar í sama skólanum, sem er óskaplega skrýtinn uppsettur. 1-4 bekkur og svo 8-10 bekkur eru á sama stað, en 5-7 bekkur allt annars staðar. Og svo er framhaldsskóli við hliðina á 1-4/8-10 húsunum. Við erum að sýna fyrir 5-7 bekk, en samt vorum við í salnum hjá 1-4/8-10 og þurftu því krakkarnir að labba þvert yfir bæinn til að koma á sýninguna.
Tókum svo ferju til baka og ég sver það að næstum alla leiðina talaði jassgaurinn (sem ég hef nú ákveðið að er alger kjeeelling) um hvað Fjordland (Noregs 1944 réttir) væri í raun óþarft, því það sé svo auðvelt að gera allan þann mat sem Fjordland gerir tilbúna. Og svo fór hann í gegnum hina ýmsu rétti og hvernig maður gerði þá frá grunni. Þetta tók næstum allan hálftímann sem ferjan tók að koma okkur yfir fjörðinn. Ég reyndar sofnaði í ca 10 mínútur, en þegar ég vaknaði var enn sami svipur á trommugaurnum (sem byrjaði óvart umræðuna með því að segjast ætla að borða Fjordland fiskibollur í middag), svona "why, oh why are you telling me this??!"-svipur. Ég fór að sjálfsögðu að hlæja og held ég hafi móðgað jassgaurinn þegar ég spurði hvort hann væri enn að tala um Fjordland. Móðgaði hann reyndar meira seinna, svo ég efast um að við verðum miklir vinir eftir að morgundeginum lýkur.

En mikið þokkalega ætla ég að sofa út á laugardaginn, maður!!

2008-11-26T23:10:00.002+01:00

Nú sér fyrir endann á leiðinlega verkefninu. Erum búin að sýna 5 sýningar af 9 og því meira en hálfnuð. Er aðeins farin að hugsa um þetta rapport sem við eigum að gera, hvort ég eigi að vera hreinskilin eða dempa mig aðeins ;) Hugsa að ég dempi mig nú smávegis, þó síðasta spurningin sé "hvað hefurðu lært af þessu verkefni". Þar langar mig afskaplega mikið að skrifa "að ég vil aldrei aldrei aldrei gera svona sýningu aftur."

Aðrar og skemmtilegri fréttir eru að skólahljómsveitin mín vann keppnina sem þau tóku þátt í um síðustu helgi. Með 98 stig af 100 mögulegum, sem er fáránlega flott :D Stelpurnar mínar stóðu sig hrikalega vel, ég reyndar gat ekki verið þarna sjálf, því ég var útí sveit að halda námskeið fyrir Hana Skolekorps (sem fyrir svo skemmtilega tilviljun er með hana í merkinu sínu, þó svo að Hana sé bara hverfi/þorp hér á Jæren), en hef það frá fólki sem var á staðnum að þær séu fáránlega góðar þarna klarinettstelpurnar :)
Svo er ég víst að fá fleiri nemendur á morgun. Sem þýðir fleiri peninga. Sem er sko BARA gott akkúrat núna :) Það munu koma inn 8 nýir klarinettkrakkar, komust víst ekki eins margir og vildu, en fékk að vita það frá litlu aspirantstelpunni minni (aspirant=1. árs nemandi) að ALLIR í hennar bekk sóttu um á klarinett af því að hún spilaði á klarinett ;)

Svo eru bara 17 dagar þar til ég kem heim. Sem þýðir reyndar að það eru bara 13 dagar í klarinettpróf. Og 12 dagar í estetikkpróf. Sem tekur reyndar alveg heila viku og þetta er heimapróf, sem þýðir að við fáum að gera það heima og nota allt hjálparefni sem við finnum...

2008-11-21T17:42:00.002+01:00

Væri einhver til í að lána mér eins og nokkur Íslendingagen?! Eða gefa mér kannski. Virðist hafa týnt öllum mínum...

Á fimmtudögum, á milli 4 og 1/2 7, eru vanalega miklar veðrabreytingar. Á þessum tíma er ég að kenna í Madlavoll skóla og það er ALDREI sama veður þegar ég fer inn og þegar ég fer út. Án gríns! Í síðustu viku breyttist veðrið frá því að vera heiðskírt, sól og fínt, í að vera skýjað, grenjandi rigning og ömurlegt. Í þessari viku var hálfskýjað og frekar heitt bara þegar ég fór inn, en algerlega hvít jörð og íssssskalt þegar ég kom út.
Ég komst svo að því í morgun að ég kann ekki lengur á snjó. Á leiðinni út götuna mína (sem er styttri en gatan mín í Borgarhrauninu) flaug ég einu sinn á rassinn og einu sinni næstum því. Svo hringdi ég í vinkonu sem náði í mig. Ég passaði mig á því að klæða mig hlýlega, sem þýddi í dag sokkabuxur, ullarsokkar, flísbuxur, bolur, peysa, flíspeysa og svo utanyfirföt. Ég var að frjósa í allan dag. Þegar ég kom heim tók það mig dágóða stund að komast upp brekkuna í götunni minni (sem er uþb. 2 metrar að lengd), fyrir hvert skref sem tók upp rann ég tvö tilbaka. Nú er ég komin heim, kyndingin er komin á fullt, allt í kertum og ég undir sæng. Hér vildi ég helst vera fram í mars, þegar vorið kemur., ef ekki væri fyrir Kvartett um endalok tímans í Dómkirkjunni í kvöld. Og jólin.

2008-11-20T20:41:00.003+01:00

Þá er jólafríið komið á hreint. Það verður hringlaga.
Kem semsagt heim 13. des, eftir smá rúnt um Skandinavíu. Tek nefnilega næturlestina til Osló, en hún þræðir suðurströndina í gegnum Kristiansand og þar. Flugvélin mín tekur svo útsýnisflug yfir til Svíþjóðar, en Oslóar og Stokkhólmsvélarnar voru víst sameinaðar...kreppan og allt það.
Á Fróni mun ég dveljast í heilar 3 vikur og 4 daga, en yfirgef klakann um leið og Giljastaur yfirgefur byggð, eða þann 7. janúar. Þá tek ég flugið til London, þar sem ég mun fjárfesta í einu stykki klarinetti áður en ég held heim til Stavanger að kvöldi þess 9.

Það var frekar áhugavert að kaupa flugmiðann frá Íslandi til London, en flugvallaskattarnir voru dýrari en flugið sjálft... Hvað er málið með það?!

Annars er allt í góðu hér, nú er bara eftir ein generalprufa á sýningunni okkar og svo ein vika með sýningum í grunnskólum hér í sveitinni. Jei :)

Elísabet var líka í heimsókn hérna um síðustu helgi. Hún kom á fimmtudagskvöldið, um það leyti sem byrjaði að rigna eftir stígvélaþurrkinn. Var allan föstudaginn og laugardaginn og fór svo á sunnudaginn, eða þegar stytti upp á ný.
Það var æðislegt að fá hana í heimsókn, eiginlega of æðislegt, því mikið ógurlega saknaði ég hennar þegar hún var farin (og geri enn!) Henni ofbauð eiginlega hvernig ég bjó (átti eina skál og tvö glös og svoleiðis), svo við fórum í IKEA, þar sem var verslað eins og Borgarhraunssystrum (hinum tveimur eldri þeas) er lagið. Að sama skapi er íbúðin mín ógurlega kósí og fín og ég get boðið fólki í heimsókn og boðið því upp á eitthvað :)

Svo reyndar gerðust þau undur og stórmerki að ég heyrði talaða íslensku! Í skólanum mínum!! Tók alveg smá stund fyrir fattarann í mér að fara í gang og svo þorði ég ekki einu sinni að tala við konurnar *roðn*. Býst við því að þær séu hér á Messiaen hátíðinni, því eina tengingin sem ég get fundið er að píanókennarinn hér var á Íslandi í sumar með masterclass og hann er líka að kenna masterclass á hátíðinni, enda Messiaen fræðingur með meiru...

En já, þetta var helst í fréttum...

2008-11-12T19:29:00.002+01:00

Þarf svo innilega spark í rassinn núna...
Í dag er ég búin að horfa á nýjustu þættina af One Tree Hill, 90210 og Hannah Montana. Búin að spila Super Mario Bros 3 og komast í borð 3-3 (persónulegt met!) og reyna að leggja mig, en ekki ná að sofna (annað persónulegt met, held að það hafi aldrei gerst áður!)
Allan þennan tíma hefði ég getað notað til að taka til í íbúðinni minni og gera tilbúið fyrir ekstra gest, æfa mig, eða skrifa verkefni fyrir musikk estetikk.
Og enn hefur ekki rignt! Ég vona bara að stígvélakaupin mín hafi ekki sett veröldina á hausinn og nú þorni Stavangersvæðið upp og verði að eyðimörk innan fárra ára... og ég hafi eytt 200 krónum í vitleysu.

2008-11-11T16:13:00.001+01:00

Gafst upp í gær á "alvöru Íslendingar nota ekki stígvél" attitjúdinu og keypti mér slíkt par.
Það hefur ekki verið jafn heiðskírt og í dag, í margar vikur...

2008-11-07T18:37:00.002+01:00

Skrapp í búðina í gær, þá sem er í hverfinu sem ég bý í, Storhaug. Það er smá labbitúr þangað, ekkert upp eða niður brekku, heldur bara flatt. Sem gerði það að verkum að ég villtist. Allsvakalega. Tók mig um 10 mínútur að labba í búðina og góðar 45 að labba heim. Hafði lengi ekki hugmynd um hvar ég var eða hvernig ég kæmist heim aftur. Fann svo mjög, svo skyndilega, götuna við hliðina á minni götu. Var samt svo rammvillt að ég fór í vitlausa átt eftir götunni og fann út að hverfið, sem er við þann enda götunnar er bara mjög svo "shady". Allavega er ég fegin að ég bý hérna megin...

Annars er ég bara að gubba á þessu fjandans verkefni (þessu með grunnskólasýninguna). Er komin með svo upp í háls af þessu að það er ekki fyndið. Og þegar jassgaurinn opnar munninn, oftar en ekki til að benda mér á að ég hafi spilað vitlausa nótu, þá langar mig helst til að lemja úr honum tennurnar. Meina, ég heyri sjálf að ég spila vitlausar nótur hér og þar og það er ekki eins og það sé eitthvað vandamál, meira svona að ég þurfi að anda eða spili óvart fís í stað f. Það þarf ekki að benda mér á það í hvert einasta fokkings skipti. Svo er ekki eins og hann spili allt pörrfekt! Ég ætti kannski að taka upp á því að benda honum á minnstu vitleysur sem hann gerir?! Sé það alveg fyrir mér, "þú átt að slá á diskinn þarna...þú átt að trampa þarna...komst of seint inn með þetta..." Án gríns, kannski ég geri þetta á miðvikudaginn!
....um þetta leyti eftir nákvæmlega þrjár vikur... Líklegast besti dagur lífs míns!!

Að öðru skemmtilegra... Er komin með nýtt klarinettkaupaplan. Ekki alveg það gáfaðasta, en hey...
Ætla að fara til London um leið og ég finn þrjá lausa daga og fjárfesta þar í A-klarinetti og munnstykki. Pundið er það mikið hagstæðara en evran að prestige klarinett er 3.500 kr ódýrara en í París. Auk þess sem búðin er með hrikalega flott úrval af munnstykkjum, Charles Bay og Walter Grabner og allskonar :) Svo nú bíð ég spennt eftir að fá að vita um dagsetningu á estetikk prófi og vonandi kemst ég fyrir jól :) Annars strax eftir þau...

2008-11-03T20:58:00.003+01:00

Var í estetikk tíma í dag og leit á klukkuna.
Hún var 12:34.
Mér fannst hrikalega gaman ad sjá tessa tølu.
Simple minds - simple pleasures!

2008-11-02T22:02:00.002+01:00

Er tad ekki merki um ad madur hafi horft á of margar hryllingsmyndir tegar madur er farinn ad sjá "dead people"?!
Var ad spila á tónleikum med 1919 í dag og get svo svarid, ad ég sá daudan kall alveg aftast í salnum ;) Gaurinn var bleikur sem nár og stód einhvern veginn tannig ad ljósid skein ekki í augun á honum og tví sá madur bara svart í stadinn fyrir augu. Svo brosti hann eitthvad svo gedveikislega ad ég var alveg á tví ad spurja Helene (sem situr vid hlidina á mér) hvort hún sæi hann líka ;)

Nei, 4 hryllingsmyndir á 2 døgum er greinilega mørkin fyrir mig :D

2008-11-01T21:13:00.002+01:00

Horfði á Psycho í gær og lifði það alveg af! Fannst hún meirasegaja ekkert svo hrikalega skerí...
Horfði líka á Village of the Damned og lifði það líka af :) Lagði samt ekki í fleiri hryllingsmyndir eftir hana og á því bæði Christine og Night of the Living Dead til góða...

Fékk tilkynningu í dag um að síminn minn sé kominn á pósthúsið en verð samt að bíða fram á mánudag með að fá hann, því ég kíkti ekki í póstkassann fyrr en 5 mín eftir að pósthúsið lokaði. Hrmpf!

Á morgun eru fyrstu tónleikarnir mínir með 1919. Í tilefni af þeim er ég að hugsa um að æfa mig eitthvað á saxafóninn fyrri partinn á morgun...

2008-10-31T15:09:00.003+01:00

Gleðilega hrekkjavöku allir saman!
Ég má segja þetta, því hér í landi er aksjúallí haldið upp á hrekkjavöku. Ekki eins brjálað og í USA, en það má sjá grasker hér og þar og í gær voru allar hillur í Nille hlaðnar hrekkjavökudóti og fullt út úr dyrum.
Í kvöld klæða krakkar sig svo upp og labba í heimahús og sníkja nammi með "trick or treat". Norðmenn eru ekki jafn mikið fyrir að "norska" hlutina, eins og Íslendingar leggja sig fram í að íslenska þá... Sem tónlistarkennara finnst mér hrikalega gott á foreldra að hrekkjavaka sé núna á föstudegi. Í fyrra var hún á miðvikudegi og börnin sem ég fékk í klarinett tíma daginn eftir voru svo upptjúnuð að það var engu lagi líkt. Núna fá foreldrarnir sko að kenna á því á morgun...hahaha!

Annars er ég búin að fjárfesta í nýjum síma. Pantaði af netinu og kíki núna á posten.no á korters fresti til að athuga með hann. Hann kom til Stavanger kl 12.40 í dag, svo ég vona að ég fái hann á morgun :) ALgjör snilld þetta sporingssystem hjá Póstinum...

Annars er lítið að frétta, Dvorák í kvöld hjá sinfóníunni og svo er planið að horfa á Psycho í kvöld, ef ég þori ;) Hef lengi horft á hulstrið á bókasafninu og langað að taka hana, en hingað til hef ég ekki einu sinni þorað að taka hana úr hillunni ;) fyrr en í gær, en tók líka alveg 4 hryllingsmyndir ;) efast stórlega um að ég horfi a þær allar. Annaðhvort það eða ég sef ekki alla helgina ;)

2008-10-27T19:45:00.002+01:00

Jæja, þá er Íslandstúrinn yfirstaðinn. Var æði að koma heim og hitta alla og allt. Fékk samt eitthvað sem ég er ekki alveg að fíla neitt svakalega. Vaknaði á þriðjudagsmorgun með hálsbólgu sem núna hefur þróast í vondan hósta og erfiðleika með að anda. Og þegar maður spilar á blásturshljóðfæri er það ekki alveg að gera sig :(

Og svo smá um internetsöguna endalausu... Kom heim á fimmtudagskvöld og þá allt í einu þurfti ég lykilorð á internetið! Sem ég auðvitað hef ekki, en jafn skyndilega í fyrradag komst ég inn og allt í læ og internetið hefur aldrei verið betra. Fæ næstum fullt hús hvar sem ég sit með tölvuna!!

Af símasögunni endalausu þá hef ég komist að því að sennilega er ekki úberlélegt símasamband í kjallaraíbúðinni minni, heldur er síminn minn úberlélegur í að ná símasambandi. Var nefnilega að spila á tónleikum í gær og náði engu sambandi inní kirkjunni, minntist á það við Ragne Marthe og hún leit á sinn síma, sem var með fullt samband!! Svo það bætist við listann, sem inniheldur ónýtt batterí, síminn velur sjálfur hver má tala við mig og hver ekki og hann er óóótrúlega sló..
Svo ég ætti virkilega að fara að kaupa mér nýjan síma, er að skoða málið þessa dagana...

2008-10-18T09:25:00.003+02:00

Sit á flugvellinum á Sola og er að klára netinneignina mína sem ég keypti fyrir löööngu...
Ég held að ég hafi náð nýjum hæðum í afslappelsi (lesist: kæruleysi) fyrir flug. Vaknaði um "aðeins" seinna en ég ætlaði í morgun og tók mig til í svona ó-sjitt-verð-að-flýta-mér kasti, dreif mig út og niður í bæ. Komst að því að flugrútan sem ég hafði planað að taka, er ekki til lengur (þeas búið að fækka ferðum og taka út akkúrat þá ferð sem ég ætlaði með), sem þýddi bara panikk. Og svo leigubíll. Sem betur fer er flugvöllurinn ekki langt í burtu, svo það var ekki of dýrt, en vikusparnaðurinn varð eftir hjá leigubílstjórunni. Svo dríf ég mig í gegnum inntékk og sekjúrití og sest svo niður og bíð. Hliðið ekki enn komið upp, svo ég bíð lengur. Svo þegar klukkuna vantar tíu mínútur í brottför kíki ég aftur, hálfhissa á því að ég sé nánast ein í flugstöðinni, engin vél fyrir utan eða neinn umgangur. Lít svo eitthvað nánar á klukkuna og sé að hana vantar tíu mínútur í tíu en ekki ellefu...

Annars er ég enn með gæsahúð eftir gærkvöldið. Martin Fröst var svo-góður-að-orð-fá-ekki-lýst. Gaurinn spilaði klarinettukonsert Mozarts og já, bara ómægod... Enda fékk hann líka standandi hyllingu á eftir :) Klarinettukonsertinn er sko nógu erfiður, en hann gerir sér lítið fyrir og bætir inn allskonar skrauti og trillum og spilar eins og hann sé að spila Gamla Nóa.
Svo hann spilaði eitt lag í viðbót, klezmerstykki og það var jú bara ennþá meira ómægod :)
Svo eftir pásuna, kemur ekki gaurinn út í sal og sest bara rétt hjá mér! Hefði getað teygt mig aðeins og snert á honum hárið... fannst það samt frekar óviðeigandi, svo ég sleppti því í þetta skiptið ;)

2008-10-17T13:28:00.003+02:00

Vaknaði í morgun alveg hrikalega fúl út í Önnu Sillu (sem var með mér í bekk í grunnskóla!). Sem mér fannst samt frekar skrítið því ég hef ekki hitt hana í þónokkur ár...
Það tók smá tíma að finna út af hverju ég var svona fúl út í hana og þegar ég mundi það loksins (draumur!), þá flissaði ég upphátt... Ætla sko ekki að hafa það eftir hér hversvegna ég var svona fúl :þ

Annars er það bara Ísland á morgun! Ég er að sjálfsögðu ekki byrjuð að pakka, ekki einu sinni farin að hugsa út í hvað ég á að taka með mér og grunar fastlega að það verði mestmegnis skítug föt sem verða þvegin í Borgarhrauninu, því jú, flest öll fötin mín eru skítug...
Svo er ég búin að týna ipodinum mínum, sem er ekki gott, því hann sér mestmegnis um að skemmta mér á ferðalögum... Vona að ég finni hann á eftir, planið er að nota þá þrjá tíma sem ég hef á eftir til að hjóla heim, taka til, borða og hjóla aftur niðrí skóla. Og af hverju ætla ég að fara í skólann á föstudagskvöldi gæti margur spurt sig (eða mig). Jú, Oslóar Fílharmónían heldur tónleika í kvöld í Tónlistarhúsinu hér og tekur Martin Fröst með sér. Fyrir óvitra, þá er Martin Fröst einn af fremstu klarinettleikurum í Evrópu og eiginlega bara öllum heiminum í dag. Og hann er að koma hingað. Jei :D

2008-10-16T11:38:00.002+02:00

Oooog... ég er orðin fræg! Búin að vera í útvarpinu og allt :þ

Hringdi einhver gaur frá UIS í gær og spurði hvort hann mætti gefa útvarpsmanni símanúmerið mitt, tók það sérstaklega fram að hann vissi ekkert útaf hverju eða um hvað málið snerist. Ég sagðist nú vera nokkuð viss um það og gaf honum leyfið.
Svo stuttu seinna hringdi gaurinn frá NRK Rogaland og spurði mig einhverra spurninga um ástandið á Íslandi (en ekki hvað?!) og hvernig það kæmi við mig. Svo bauð hann mér í viðtal í útvarpinu og mætti ég í útvarpshúsið fyrir sjö í morgun!! Vaknaði semsagt kl 6.15, en það er um það bil 5 og hálfum klukkutíma áður en hausinn á mér vaknar...
Ég náði nú samt alveg að segja eitthvað af viti, enda búin að spurja pabba spjörunum úr kvöldið áður ;)
Hann spurði samt aðallega um hvernig þetta kæmi við fólk og við mig og auðvitað dramahliðina á öllu saman. Ekki skemmdi heldur fyrir að Dagbladet birti í gær grein um að á Íslandi væru til birgðir af mat fyrir 5 vikur og svo ekki söguna meir...

En annars er það bara Ísland eftir 2 daga :) Jei fyrir því!

2008-10-10T17:11:00.002+02:00

Einhver afskaplega einlægur Íslendingur setti þetta á netið.
Ég nennti nú eiginlega ekki að lesa lengra en fyrstu málsgrein og skannaði svo kommentin og komment númer 5, frá Arunas í Vilnius, LT, sá hitti aldeilis naglann á höfuðið, jú auðvitað eigum við bara að borga Gordon Brown tilbaka í MÖRGÆSUM og goshverum!!!
Æ, mér finnst svona alltaf svo ógurlega fyndið :D Tótallí made my day!!

2008-10-09T15:07:00.002+02:00

Undanfarna daga hefur Ísland verið mikið í fréttum hérna megin við hafið og þar sem ég er Íslendingur er gjarnan rætt um þessar fréttir þegar ég er nálægt. Sem er ekkert svakalega gott fyrir mig, því ég veit eiginlega ekkert hvað er á seyði nema að ríkið er að kaupa alla banka og krónan er í frjálsu falli...
Í dag var ein slík umræða í gangi í mötuneytinu og ein stelpa, sem jafnan virðist bara með ágætar gáfur og skilning, spurði:
"En af hverju reddar Danmörk ykkur ekki? Þið heyrið jú undir Danmörk!"
Ég varð alveg bit og gat ekki annað en bara hlegið og náði svo að stama útúr mér "ööö, nei. Við höfum verið sjálfstæð þjóð í meira en 60 ár."
Þetta allavega bjargaði alveg deginum fyrir mig ;)

Og hvað ætli fátækur íslenskur námsmaður í útlöndum geri þegar svona stendur á?! Jah, allavega pantaði ég flug heim í nokkra daga :) Er semsagt loksins búin að panta flugið fyrir þetta dæmi fyrir háskólann og verður víst ekki aftur snúið. Var næstum því hætt við um daginn, þegar ég fékk email frá norska sendiherranum á Íslandi að dagurinn hefði verið fluttur aftur um einn dag, eða til 22. okt. Þetta kom að sjálfsögðu á besta tíma, þar sem dansekvinnen er í Afríku og hinn aðalkennarinn er líka í burtu og hvorugt kemur tilbaka fyrr en á miðvikudaginn í næstu viku, svo ég gat ekki fengið leyfi hjá neinum. En ég tók bara sénsinn og pantaði flugið, með samþykki hinna í grúppunni minni.
Svo þar sem krónan er svo helvíti hagstæð, þá er gisting á Hilton bara alveg möguleiki :D Held samt að Cabin verði fyrir valinu...

Annars er frekar erfitt að ná í mig þessa dagana, síminn minn er kominn með svo mikið attitjúd vandamál að hann er að gera mig bilaða. Ef fólk reynir að hringja í mig, er bara happ og glapp að síminn minn taki við símtalinu, komin frekar mörg atvik þar sem fólk segist hafa verið að reyna að ná í mig og ég bara huh?! því ekki hefur síminn sýnt þess eitt einasta merki... Þeas. þegar hann er ekki batteríslaus, en batteríið lifir rétt tæplega frá morgni til kvölds, ef ég td hringi eitt símtal, þá get ég vel búist við því að hann deyi um fimm leytið...

En óvell, grjónagrauturinn er tilbúinn og ég farin að borða...mmmmm :)

2008-10-02T12:40:00.002+02:00

Nemendur hér í skólanum eru alveg einstaklega lausir við að fylgjast með nemendafélögum, um daginn kom gaur frá AlþjóðlegirNemendur-félaginu, svo alþjóðlegir nemendur hér gætu kosið. Hann var afskaplega einmana, þar sem hann sat í anddyrinu með tölvuna sína og kjörkassann...

Átti mjög skrítið spjall við danskellinguna í fyrradag. Hún, sem varð alveg kolkreisí þegar ég bað um frí til að fara á ráðstefnuna, var hin yndislegasta og margbaðst afsökunar á því að hafa verið svona leiðinleg. Var ekki alveg að skilja þetta, fyrr en hún minntist á að hún hafði fengið áframsent email frá annarri, sem ég sendi, þar sem ég útskýrði ástæðurnar fyrir því að ég vildi fara á þessa ráðstefnu (að sjálfsögðu smá dramatíseraðar)...

Svo núna er það minnsta málið í heiminum að ég fari bæði til Íslands og til Englands og Frakklands. Þarf að sækja um leyfi sam sem áður, en það er samt bara svona formsatriði núna...

Hef samt alveg fundið annað til að pirra mig á, það er einn jazzgaur í hópnum okkar í tverrfaglig verkefninu og hann er SVO smámunasamur og leiðinlegur! Í stuttu máli er það sem við stingum upp á ómögulegt, því við erum jú öll hin þrjú klassísk og það sem hann stingur upp á er frábært, því hann er jazzgaur... Það er ekki hægt að bera neitt undir okkur, heldur bíður hann þar til kennararnir koma og spyr þá um allt...
Mikið verð ég fegin þegar þetta dæmi er búið!

En jæja, verð víst að fara að halda áfram í verkefninu...bleh!

2008-09-29T17:11:00.003+02:00

Ohh, ég gæti grenjað núna!!

Ég pantaði mér far til París í endaðan október. Ætlunin var að kaupa mér A-klarinett. Daginn sem ég pantaði þetta, átti ég fyrir klarinettinu í íslenskum peningum og planaði að borga flug, hótel og uppihald í norskum óperupeningum, sem ég vann mér inn með blóði, svita og tárum í síðustu viku. Gott plan. Nema... Í dag hefur krónan lækkað það mikið að klarinettið er tæpum 100 þúsund kalli dýrara en það var daginn sem ég pantaði flugið...
Get mögulega reddað þessu með því að millifæra alla peningana mína til Noregs, þá tapa ég allavega ekki meiru á næsta mánuði :(

Svo var einhver ábyrgðarfullur nemi hér við skólann sem stal símanum mínum! Eða sko, ekki alveg samt ;) Skildi símann víst eftir í smástund á borði frammi á gangi. Svo loksins þegar ég man eftir honum og fór fram, þá var enginn sími þar, heldur bara miði um að hér hafi fundist sími og farið hafi verið með hann inn á skrifstofu. Og það var að sjálfsögðu akkúrat búið að loka skrifstofunni...

Sver það að annaðhvort hef ég gert eitthvað hrikalegt karmalega séð, eða þá að það er eitthvað stórt og fráááábært sé í vændum... Plís að það sé það seinna...prittí, prittí plís!!

2008-09-28T20:38:00.002+02:00

Þetta með internetið er að verða saga í nokkrum köflum. Ég fann heitan punkt, þar sem ég fæ alveg 3 strik af 4 mögulegum og fæ ágætis hraða á netinu með þeim strikum. En svo í gær ákvað tölvan að þetta internet væri henni ekki samboðið og neitar að hleypa mér á netið, þó svo að airportið sé alveg með 2-3 strik... Gaman að þessu!

Annars er fátt að gerast annað en pirrandi hlutir þessa dagana. Er allskostar ekki viss um að ég nenni að standa í þessu með Íslandstúr. Auðvitað væri ljúft að koma gersamlega fríkeypis heim, en fyrst þessi kellingarbeygla þarna ætlar að fara yfirum (hún kvartaði í skrifstofuna!!), þá er ég ekki að nenna að standa í þessu veseni. Nú semsagt þarf ég að sækja um sérstakt leyfi til þess að geta farið til Englands. Sem þýðir að ég þarf að eltast við hvern einasta kennara sem kennir mér eitthvað (eða sér um asnalega tíma sem ég er skylduð nauðug til að mæta í) og fá undirskrift um að það sé hans vegna í lagi að ég verði frá skólanum þessa daga sem ég ætlaði að vera í burtu. Og svo er auðvitað verkefnavika í næstu viku, svo ég veit ekki alveg hvernig ég á að fara að því að finna kennarana, nema auðvitað þá sem "kenna" tverrfaglig...
Allur sá metnaður sem ég hafði fyrir þetta verkefni í upphafi annar er farinn útum þúfur, ég mun héðan af gera sem minnst, hafa sem minnstan metnað og leggja minnstan mögulegan tíma í þetta dæmi...

Var að spila á óperuhátíð í síðustu viku, ásamt fleirum "sérstaklega völdum" (beint úr prógramminu) nemendum úr skólanum. Konan sem stjórnaði kunni ekki að stjórna, hvorki að telja rétt, eða sveifla höndunum rétt. Svo ef við reyndum að koma með athugasemdir eins og hún þyrfti að gefa okkur tíma til þess að gera okkur klár áður en hún byrjaði var svarið "þið verðið bara að taka betur eftir", eins og það hjálpaði eitthvað þegar hún stendur kjur og horfir eitthvað út í loftið og svo bara allt í einu "og núna!" og þá eigum við að byrja!
Ekki hjálpaði það heldur að hún stjórnaði eftir píanóútdrætti og vissi þar af leiðandi ekkert hver átti að koma inn með sóló hér og þar og meirasegja í sumum lögum vorum við með eitthvað allt annað en hún vildi meina að við værum með, tók heillangan tíma fyrstu æfingarnar að gera henni grein fyrir því að við gætum ekki spilað það sem ekki stæði í nótunum og gætum ekki vitað að við ættum að hoppa yfir 30 og eitthvað takta í nótunum, nema að hún segði okkur það...
Þessi síðasta vika var semsagt alger brandari, held ég hafi sjaldan flissað jafnmikið á æfingum og á þessum :)

Svo fór gærdagurinn í að spila á tónleikum með Kvadrat Musikkorps, námskeið frá 10-2, tónleikar kl 4 og svo teiti um kvöldið. Við getum orðað þetta þannig, að fyrir utan Åsmund (sem eiginlega er 40 ára í anda), þá yngdi ég meðalaldurinn um ca 10 ár. Til að byrja með var teitið ekkert leiðinlegt, bara verið að tala saman og maturinn (sem ég kveið soldið fyrir, eftir fyrri reynslur) reyndist vera mjög góður, taco og tortilla allskonar! Svo leið á kvöldið og fólk drakk meira og meira og varð skrítnara og skrítnara. Gafst svo upp þegar Ole Ivar var skellt á fóninn og allir með það sama út á dansgólf :) Fór reyndar ekki alveg strax, því ég áttaði mig á því að ég hef aldrei á ævinni séð fólk dansa svona alvöru, í pörum og aksjúallí verið að dansa einhvern ákveðinn dans, eins og vals og svoleiðis...! En komst að því að þetta var ekkert fyrir mig og kvaddi fljótlega ;)
Við tók svo klukkutíma rölt um Forus, fyrst til að finna bensínstöð og ná mér í pening og svo til að finna strætóstoppistöð...
Ágætis ævintýri ;)

Annars er haustið að kikka inn þessa dagana, laufin á trjánum eru að byrja að gulna og það er svona að byrja að verða soldið kalt á nóttunni. Reyndar hefur veðrið verið ótrúlega fínt, sól, smá gola og alveg á mörkunum að maður þurfi að vera í peysu yfir daginn. Einn daginn var reyndar rigning, verð að viðurkenna að ég hafði alveg gleymt möguleikanum á því að það gæti rignt og var því nokkuð hissa þegar ég kom út að það var allt blautt. Fannst þetta líka yfirmáta óþægilegt, svo við tölum ekki um leiðinlegt! En það stytti upp daginn eftir og ég gat tekið gleði mína á ný :)

En núna held ég að það sé orðið laust æfingaherbergi, svo ég er farin! óver and át

2008-09-25T14:02:00.002+02:00

Ohhh...pirrr....!

Ég er í tímum þessa önnina sem eru að eyðileggja allt fyrir mér...
Þetta eru vinnutímar, heita þverfaglegt verkefni og snúast um að öllum á þriðja ári (í klassík, dans og jazz) er skipt upp í hópa og við eigum að búa til sýningu til að sýna í grunnskólum síðustu vikuna í nóvember.
Ég er að öllu leyti ósátt við þessa tíma, sem við erum skylduð til að mæta 100% í.

Fyrir það fyrsta er þetta mínu námi algerlega óviðkomandi, fyrir utan að jú, ég spila aðeins á klarinett í okkar sýningu (ekki einu sinni klassíska tónlist, eða neitt sem gæti mögulega talist krefjandi).
Svo tekur þetta hrikalega mikinn tíma, við erum skylduð til að vinna í þessu í 6 tíma á viku og ofan á það kemur undirbúningur og önnur heimavinna.
Það eru allar verkefnavikur þessarar annar lagðar í þetta dæmi, þá eigum við að vera að vinna í þessu frá 10-16 alla virku dagana og svo hafa orku til að æfa okkur.
Við eigum að fara með sýninguna í grunnskólana síðustu vikuna í nóvember. Sem er líka síðasta vikan fyrir jólaprófin. Þá erum við í burtu allan daginn, erum með 2-3 sýningar á dag og eigum svo að hafa orku til að æfa okkur.
Mætingarskylda er 100% í þessa tíma. En við megum samt "skrópa" tvisvar ef við höfum góða ástæðu til þess.
Ég var fyrir löngu búin að plana að fara á MND ráðstefnuna í Englandi síðustu vikuna í október. Ef ég yrði allan tímann, myndi ég missa af 4 tímum, svo ég þarf að fara fyrr heim til að ná á þennan bjánatíma.
Svo bauðst mér í gær að fara fyrir hönd UiS til Íslands og sitja einhvern fund með Háskóla Íslands, vegna mögulegs samstarfs HÍ og UiS.
En nei, það er líklegast ekki að gerast, því danskellingarskrukkunni sem er yfir þessu "fagi", finnst þetta svo mikið vesen, að ég sé í burtu rétt áður en við eigum að fara í skólana...
Nú er dramadrottningin í mér sko virkilega ósátt, að það eigi að banna mér að fara heim, algerlega fríkeypis (flug, uppihald og allt), af því að ég þarf að vera í einhverjum tímum, sem tengjast mínu námi akkúrat ekki neitt!

2008-09-10T12:26:00.002+02:00

Þetta með internetið var víst bara djók. Núna sit ég í skólanum til að gera það allra nauðsynlegasta, og svona líka aðeins minna nauðsynlegt, því ég næ ekki interneti heima hjá mér, nema einstaka sinnum og þá snemma á morgnana (klukkan svona 6-6.30) og sénsinn að ég vakni bara til þess að fara á netið!
Svo að núna bý ég í hybelinu mínu, án sjónvarps og internets. Ég hélt alltaf að ég gæti ekki verið lengi án sjónvarps eða internets, en það venst alveg furðulega fljótt.
Verð nú samt að viðurkenna að ég svindla helling, horfi á dvd í tölvunni, með hjálp frá bókasafninu og lagernum mínum.
Hef nú komist að því að það að horfa á hálfa seríu af The L Word (lesbíuþátturinn) á tveim kvöldum, er eiginlega mannskemmandi. Ég allavega skil ekkert í því að það sé til fólk sem ekki er gullfallegt og að allar konur hoppi ekki á hvora aðra þegar þær hittast, þegar ég svo kem út í alvöru heiminn...
Annars er hybelið mitt mjög fínt, á besta stað í bænum, tekur svona 10 mín að hjóla í skólann og ca 5 mín að labba niðrí bæ, sem ég geri samt helst ekki þessa dagana, því ég er að reyna að spara. Og hef alveg tekist það, að eyða ekki nema í nauðsynjar, mat og svoleiðis ;)

Í gær fór ég á lúðrasveitaræfingu númer tvö. Í þetta skiptið var ég aaalein á alt sax og það bara hrundu til mín sóló í hverju einasta fokkings lagi! Ég sem hélt að alt sax væri svona undirleiks í lúðrasveit, einskonar úmpah hljóðfæri, en ónei, skil ekkert í því að saxarnir eru ekki látnir standa fremst, svona til að aumir klarinettuleikarar séu ekki plataðir á saxinn...
Í þessari lúðrasveit eru á bilinu 50-60 manns, sem þýðir að á síðustu 2 æfingum hef ég þurft að kynna mig svona 30-40 sinnum. Það þýðir hinsvegar að ég hef þurft að segja nafnið mitt oftar en 100 sinnum. Það tekur fólk nefnilega oftast 3-4 tilraunir til að ná nafninu mínu. Það er á svoleiðis stundum sem mig langar bara að heita Anna...

Já, það er eiginlega ekkert meira að frétta, jú, nema að ég fæ líklegast trompetinn minn í dag, þennan fjólubláa sem ég keypti af ebay í vor. Það er sko búið að vera vesen, enda ekki við öðru að búast þegar ég kem við sögu. Hann lenti nefnilega í tollinum, og var fastur þar í allt sumar, því ég þurfti að borga hann út. Nú, ekki gat ég látið senda hann heim til Abdellah, þegar ég var flutt þaðan, svo ég gaf kallinum upp heimilisfangið hjá háskólanum, en það átti bara að vera formsatriði, því þeir eiga að hringja til að athuga hvort maður sé heima áður en þeir koma. En sá sem kom með pakkann minn, gerði það greinilega ekki og droppaði honum bara á póstmóttöku háskólans. Svo fæ ég bara allt í einu email um að ég hafi fengið pakka og geti náð í hann þar. Nema, að póstmóttakan er aldrei opin, ég reyndi að fara þangað og það var lokað, ég reyndi að hringja og þeir svöruðu ekki. Svo að ég sendi svar á emailið um að ég vildi fá nákvæman tíma hvenær það væri í alvörunni opið hjá þeim og fékk svar tilbaka að þeir gætu bara sent pakkann hingað niður til Bjergsted. Svo að hann er víst á leiðinni hingað á eftir :)

Og núna er ekkert meira að frétta frá mér! Þangað til næst...

2008-09-02T16:55:00.002+02:00

Ég er nú opinberlega flutt í nýju íbúðina og .... tatarataaaa! Ég er með interneeeeeet :D

Það kemur samt soldið og fer, en hei, það er skárra en ekkert :)

Búin að skila bílaleigubílnum, og mun aldrei aldrei aldrei leigja mér bíl aftur! Eða...allavega mun ég passa vel upp á lykilinn!

Svo er ég að fara á lúðrasveitaræfingu á eftir, einhver þarna fann handa mér saxófón, svo að ég er með hjartað í buxunum um hvort ég kunni ennþá á svoleiðis fyrirbæri :) Er búin að vera að rifja upp í huganum með fingrasetningar og er að spá í að koma við á bókasafninu og fá mér nokkrar kennslubækur með fingrasetningamyndum til að rifja upp ;)
En nú er ég farin í sturtu í nýju íbúðinni minni :)

2008-09-01T22:17:00.002+02:00

Ef þú værir bíllykill, hvar myndirðu þá fela þig?!

Jú, ef þú værir bíllykill í minni vörslu, þá gæti verið að þér fyndist ferlega sniðugt að límast fastur í límband undir kassa og vera algerlega pikkfastur þar, þangað til ég skrapaði þig undan með því að nenna ekki að lyfta kassanum almennilega upp í bílinn...
Meina, hversu ömó er hægt að vera þegar maður er einn lítill bíllykill?!
Og djös að mér hafi ekki dottið í hug að líta UNDIR kassana í öll þau skiptin sem ég var að leita að fjandans lyklinum!!

En já, lykillinn er semsagt fundinn og þarf ég því væntanlega ekki að borga nema 1250 kr í sekt, í stað 3125 kr, hefði ég týnt honum algerlega...

Ég er núna alveg næstum því flutt í nýju íbúðina mína. Hún er bara voðalega sæt eitthvað finnst mér. Kannski er ég bara svona ánægð yfir að flytja í mína "eigin" íbúð, en mér finnst hún bara hugguleg. Samt á ég nú eftir að sakna Mette og Therese alveg ofboðslega, finn það alveg strax.

Ég byrjaði í skólanum í dag. Fór í einn tíma, musikestetikk og filosofi. Veit ekki alveg hvað estetikk þýðir, en þetta er eitthvað um heimspekina og dótarí. Kennarinn, hann Per Dahl, er algert æði, svona algerlega krúttlegur kall, hlær á ótrúlega fyndinn hátt og já, bara svo mikið rassgat ;)
Svo fer ég í næsta tíma á miðvikudaginn, sá tími er í Storhaug skóla (eigum að fylgjast með barnatónlistarsýningu) og haldiði ekki að það sé skólinn í næstu götu við nýju íbúðina!! Nú er sko Karma eitthvað að gera mér upp leiðindalykilinn ;)
Annars er ég í voðalega fáum tímum í skólanum í vetur, sem er ágætt, því ég þarf víst að finna mér einhverja vinnu svona með, til að eiga efni á nýju klarinetti og svo til að eiga efni á að halda áfram í skólanum næsta vetur ;)

2008-08-28T18:38:00.002+02:00

Díses, hvað lífið getur sökkað stundum!! Eða kannski frekar hvað ég get sökkað stundum...

Ég leigði bílaleigubíl um daginn til þess að flytja allt dótið mitt hingað inn á skrifstofuherbergið mitt. Ég bar það allt samviskusamlega upp í herbergið og svo þegar ég ætla að læsa bílnum, þá finn ég hvergi lykilinn!!
Svo nú, degi eftir að ég átti að skila bílnum, finn ég ekki enn lykilinn, búin að snúa öllu við nokkrum sinnum, búin að taka allt út úr herberginu og setja inn aftur og leita í öllum mögulegum og ómögulegum töskum, kössum og körfum, inní í húsinu og fyrir utan það og í bílnum og hvergi finnst fjandans lykillinn.
Hringdi í bílaleiguna og þær þurftu að fá lykilinn frá Osló, svo að bíllinn stendur hér fyrir utan, sem kostar mig um 300 norskar krónur á dag, aukalega við upphaflegu leiguna, OG ég þarf að borga 3000 kall í sekt!!
Frábær byrjun á skólaárinu!

Ef ekki hefði verið fyrir gaurin sem hringdi í mig áðan og bauð mér að koma og skoða íbúð rétt við miðbæinn á fáránlega góðu verði, þá væri ég búin að pakka saman og panta flug heim núna...

2008-08-26T19:12:00.002+02:00

Já, kannski sé kominn tími til að láta aðeins heyra í sér...

Ég nennti ekkert að blogga í sumar, hef enga afsökun, það gerðist alveg fullt, ég bara nennti ekki að blogga..

Ég var að vinna á hælinu, í sundlauginni, innlagnafulltrúi og aðeins á læknastofunni. Stundum vann ég frá 7.30-22, svo það var ekki mikill tími í neitt annað...

Ég fór á landsmót skáta í endaðan júlí, sem var svo gaman að orð fá varla lýst. Veðrið var frábært, hjálparfólk og foreldrar voru frábær og krakkarnir voru vægast sagt frábær, nei, þau voru sko meiriháttar æðislega frábær. Held ég verði sko ekki lengi að segja já, ef ég verð beðin um þetta aftur!

Í byrjun ágúst skruppum við famelían vestur í Djúp, þeas. öll nema Örvar sem var (og er víst enn) staddur á einhverri íþróttakeppni í Kína ;) Það er ekkert yndislegra en að dvelja í sveitinni, maður nær alveg að kúpla sig niður, enda ekkert gsm samband, internet, já eða tölva, og bara RÚV í sjónvarpinu.
Ég veiddi fyrsta fiskinn minn! Ég, sem hef farið í talsvert fleiri veiðiferðir en hinn almenni borgari, ótal billjón sinnum upp að vatni og svo með pabba í fjölmargar laxveiðiferðir, hef nefnilega aldrei á ævinni veitt fisk. Held samt, að einu sinni hafi pabbi sett í einn og fest hann vel og svo ég fengið að draga hann inn, en annars hef ég aldrei veitt fisk. Fyrr en þarna um daginn, að ég veiddi einn silung :)
Við systurnar fórum svo í smá nostalgíuferð upp að Myllufossi með krakkana, sem var aðeins meira en æðislegt.
Aðrir ritúalar voru líka framdir, svo sem að skrúbba allt slý úr lauginni, þó við kæmumst svo bara einu sinni í hana. Ætluðum tvisvar en þá hafði einn úr sveitinni farið ofaní til að þvo af sér örugglega-einhverra-vikna-gamlan skít, sem flaut ofan á vatninu innan um hár af sama hausi. Við höfðum ekki lyst til að fara ofan í á eftir honum!
Þessi laug er nefnilega alveg furðulega eftirsótt, að það hafa oftast verið vandræði fyrir okkur sem eigum laugina að komast ofaní fyrir ágangi túrista og annara ókunnugra, sama hvernig skilti og skilaboð við setjum við hana, það virðist ekkert duga...!
En þetta eina skipti var samt æði :)

---------------------

Og svo annað í fréttum að ég er búin að flytja...
Ég semsagt gafst upp á kallfjandanum.
Hann hringdi í mig í endaðan júní og sagði að ég þyrfti að flytja út áður en skólinn byrjaði, því hann væri búinn að finna þrjár stelpur til að búa í kjallaranum. Ég var í vinnunni og gat því ekkert svarað honum að ráði, en hann sagði samninginn minn bara hafa gilt í eitt ár og því hefði ég engan samning og þá mætti hann henda mér út með 1 mánaðar uppsagnarfresti. Sem og venjulega, var ekkert hægt að rökræða við mannfjandann, svo enginn endir fékkst í málið.
Svo hringir hann aftur rétt fyrir ágúst og segir aftur að ég þurfi að flytja út fyrir skólabyrjun, þá var ég búin að panta flugmiða og sagðist myndu koma seint 24. ágúst og gæti bara engu breytt með það. Hann sætti sig við það.

Síðan ég talaði við hann fyrst hef ég legið inn á helstu leigusíðum í Noregi, en fann ekkert fyrr en ég var að lesa stavangerskt dagblað og þar stóð að háskólinn hefði verið með neyðarúrlausn fyrir fólk án húsnæðis, svo ég hafði samband við skólann og fékk inni í þessu neyðarhúsnæði, svo ég gat andað aðeins léttar og notið sumarfrísins.

Svo þegar ég lendi í Osló á sunnudagskvöldið bíður mín sms frá mannvitsbrekkunni, um að ég hafi ætlað að flytja þann daginn og ef ég svari ekki þá muni hann henda öllu út úr herberginu mínu (í annað skipti sem hann hótaði því), ég sendi honum fyrst sms um að ef hann geri það, þá muni ég hringja á lögguna, því hann má ekki einu sinni fara inn í herbergið mitt án leyfis. Svo hringdi ég í hann þegar ég var aðeins búin að róa mig niður og búin að búa til smá sögu um að fluginu hafi seinkað og ég þurfi að taka næturlest til Stavanger (sem var haugalygi, flugið var á svo hárréttum tíma, og ég hafði alltaf ætlað að taka næturlestina)
Svo þegar ég kem til Stavanger í gærmorgun, byrja ég á því að fara upp í skóla og ná í lykil að herberginu og skilja eftir farangurinn. Svo á leiðinni upp í íbúðina, um 9.30 þá fæ ég sms um að ég eigi að vera búin að tæma herbergið og þrífa kl 12. Öll plön um að pakka skipulega niður, fóru algerlega í vaskinn og ég hrúgaði dótinu mínu í töskur og kassa sem ég átti og henti fram, fór svo að ná í bílaleigusendibíl sem ég átti pantaðan og henti dótinu mínu upp í hann og brunaði burt.

Það voru 2 stelpur fluttar inn og ég notaði tækifærið og sagði þeim frá því hvernig Abdellah væri í raun og veru, öllu strögglinu sem við Mette og Therese stóðum í og svo hvernig hann er búinn að láta við mig í sumar. Helst langar mig samt að fara með þetta í blöðin eða eitthvað, láta hann virkilega kenna á því!

En ég er allavega flutt núna, á bara eftir að finna mér alvöru húsnæði og mikið vona ég að það gangi betur næst!!

2008-07-02T00:27:00.002+02:00

Og áfram heldur það...
Var spurð að því í gær hvor ég hefði ekki verið með ákveðinni stelpu í bekk. Ekkert að því nema að téð stelpa er 6 árum yngri en ég ;)

2008-06-26T20:21:00.002+02:00

Hélt ég myndi springa úr hlátri um daginn, átti svo skemmtilegt samtal :)

Kona: Já, og þú verður hér í sumar?
Ég: Jájá.
Kona: Og hva, þú ert bara næstum því fullorðin?
(Ég: ekkert svar)
Kona: Hvað ertu eiginlega gömul?
Ég: 26 ára.
Kona: Nú?! Ji, þú ert svo smábarnaleg!
Ég: ok...

Ég get ekki ákveðið mig, hvort er meira brilliant, næstum því fullorðin eða smábarnaleg ;)

2008-06-14T20:13:00.003+02:00

Hnjé hnjé hnjé....

Leigusalinn, hann Abdellah (sem er algert fífl), var hér áðan. Hann var að láta mig vita að hann ætlar að hækka leiguna í 3500, ég vissi reyndar alveg af því, því við fundum auglýsinguna á finn.no. En ég sagði að ég þyrfti þá líklegast að flytja og ætla að láta hann vita á morgun. Hann vildi þá að ég flytti út 1. ágúst (hann segir háskólann vilja leigja íbúðina og þeir vilja þá væntanlega fá hana þá, auk þess sem það eru langflestir að leita í sumar), en ég sagði bara neinei, samkvæmt samningnum á ég 3ja mánaða uppsagnarfrest og hef því til lok sept að flytja út. Ég ætla að standa svo fast á því, hann mun þurfa að borga mér (og það veeel!) til að fá mig til að flytja út fyrr :)
Fíbbl!

2008-06-12T19:55:00.002+02:00

Mig er búið að kvíða fyrir því í marga mánuði að fara með nokkrar bækur og geisladiska á bókasafnið. Ég nefnilega náði að týna bæklingunum frá diskunum og skammaðist mín alveg niðrí rassgat fyrir það. Svo, að í marga mánuði, hef ég frestað og lengt lánið á öllu, þar til í dag, að ég gat ekki frestað þessu lengur og fór á bókasafnið með allt draslið. Byrjaði á að skila bókunum og var alveg með hjartað í buxunum yfir að fara inn með diskana.
Hvað helduru að hafi verið inn í einni bókinni?! Jú, bæklingarnir!!

2008-06-11T22:44:00.001+02:00

Jæja, einkunnir eru farnar að týnast inn á þartilgerðan vef skólans. Ég er búin að fá á hreint að ég þarf aldrei aldrei aldrei að gera hljómfræði aftur eða spila á píanó, frekar en ég vil og verður það þá eftir mínum reglum :)

JEI :D

2008-06-09T22:34:00.005+02:00

SUUUUMAAAARFRÍÍÍÍÍ :D

Loksins loksins loksins er ég komin í langþráð sumarfrí...og um leið byrjar að rigna! Síðasta mánuð hefur verið þvílík bongóblíða og ég reynt að halda mig innandyra og þóst vera að læra, svo um leið og ég, með góðri samvisku, get lagst út á ströndina, þá droppar hitinn niðrí skítkalt og á að fara að rigna. Hrmpf!

En semsagt, tónheyrnarprófið gekk bæði vel og illa og gildir það um bæði skriftlegt og munnlegt. Sorglegt hvað ég er hrikalega léleg að syngja laglínur, en setjið fyrir framan mig hljóðfæri og þá er það pís of keik.

Annars hef ég gert mikið annað en lært undanfarið, enda ekki hægt að æfa tónheyrn nema í takmarkaðan tíma. Held að of mikil tónheyrn geri fólk álíka geðveikt og óbóspil...

Fór td í miðnæturgöngutúr um daginn. Við Mette ákváðum að fara í smá túr, klukkan var orðin tólf og hitinn ennþá yfir 20 stigum, svo við fórum út á stuttbuxum og bolum, eiginlega bara til að geta sagst hafa verið úti eftir miðnætti á stuttbuxum og bol :) Túrinn varð þó mun ánægjulegri fyrir Íslendinginn mig, þegar við sáum þetta ofursæta dýr :)

Sætur, nó?!
Fleiri hér: http://web.mac.com/berglind.h/Site/Upphaf.html

2008-06-03T00:24:00.000+02:00

Hrikalega fyndin auglýsing frá Tine :)

2008-06-02T22:56:00.002+02:00

Veit ekki hversu oft ég hef ætlað að skrifa eins og eitt blogg, en maður á engin orð...
Hluti af mér langar til að hoppa upp í næstu flugvél, en á hinn veginn er ég afskaplega fegin að vera ekki heima þessa dagana, ég væri orðin ein taugahrúga, þeas. ef ég hefði lifað af þann stóra. Ef það er eitthvað sem ég virkilega hata, þá eru það jarðskjálftar!
Elísabet tók myndir af rústinu í húsinu og setti inn á síðu Laugateigskrakkanna.

Annars líður fljótt að heimferð. Kláraði hljómfræðipróf í dag, bara 5 klukkutímar, takk fyrir. Nú þarf ég aldrei aftur að hugsa um hljómfræði, jei :) Nema náttúrulega eiginlega alltaf ;)

Hér er skýjað akkúrat þessa stundina. Að sjálfsögðu. Hefur ekki sést ský á himni síðan einhvern tíma í síðustu viku, þá var eithvað hvítt lengst út við sjóndeildarhringinn, fræðimenn hafa kallað það fyrirbæri ský. Svo í dag, loksins þegar ég get legið í sólbaði á þess að fá samviskubit, þá verður alskýjað og kalt. Týpískt. En það á að birta til á morgun, sól og 26 gráður. En eftir það er það víst bara niður á við. Fúlt.

Nú er það heimferð eftir 13 daga. Eins gott að jörðin verði til friðs!

2008-05-28T00:37:00.003+02:00

Aldrei aftur píanó!!
Tók lokapróf í píanóspili í dag :) Sem gekk bara ágætlega. Nú þarf ég aldrei aldrei aldrei aftur að spila á píanó. Á samt alveg örugglega eftir að spila aftur, því ég sækist í píanó eins og fluga að eldi , þegar ég sé slíkt (ein vinkona úr grunnskólanum var oft orðin ansi pirruð ;), en það verður þá sjálfviljugt spil, sem er jú miklu skemmtilegra ;)

Ég er líka búin að skila tónlistarsöguritgerð. Hún var ekkert spes samt. Var þó innan lengdarmarka, sem er einn plús. Verður örugglega langt þar til ég fæ að vita eitthvað, í fyrra þurfti ég að reka á eftir kennaranum að setja inn einkunnirnar í júlí og þá þurfti hann bara að fara yfir rétt og rangt...!

En nú er kominn sá tími sem öll hljóðfærapróf eru búin, klarinettprófið var á föstudaginn, fæ að heyra út úr því á morgun... (úff!) Það gekk samt ekki sem verst, varð ekkert stressuð (vanalega er ég svo stressuð að ég stend varla í fæturnar, þegar ég á að spila fyrir aðra og sérstaklega í prófum), svo ég vissi eiginlega ekkert hvað ég ætti að gera við alla þá orku sem fer venjulega í að halda mér uppi. Það sama gerðist reyndar í dag í píanóprófinu, svo kannski þetta stressrugl sé bara búið?! Vona það allavega...

Nú eru bara þrjú próf eftir og ein verkefnaskil í nokkrum þáttum... Þar sem öll hljóðfæraprófin eru búin og þessi ritgerð sem er búin að liggja yfir manni í allt vor, þá er ég svo afslöppuð, eiginlega um of... :) Ekki hjálpar það heldur að það er svona 20 stiga hiti á daginn og glampandi sól. Grasið er meirasegja farið að sviðna og ég varð fyrir árás þriggja úðara á leiðinni heim í dag ;)

2008-05-25T16:33:00.001+02:00

Ég er nokkurn veginn viss um að uppáhaldslagið hjá henni Ulrikke (9 ára dóttir húseigandans) hér á efri hæðinni, er Eurovisionlag Norðmanna. Það hefur allavega gengið stanslaust á repeat síðan ca 10 í morgun...

2008-05-24T16:09:00.004+02:00

Vaknaði í morgun með lag á heilanum. Veit ekki hvernig ég fékk það á heilann, því ég hef ekki heyrt þetta lag í laaangan tíma. Mundi ekki hvað það hét, eða hver það var sem söng það og var því alveg óheyrilega pirruð, því svona verð ég alltaf að vita ;) En ég mundi að það var í myndinni Uptown Girls, svo ég fór á netið og fann lagið á endanum á youtube. Endaði svo á smá vídjósörfi á youtube og rakst á vídjó með svo fyndnum titli að ég kíkti:

WHAT DO YOU DO WITH A B.A IN ENGLISH

Komst svo að því að þetta er úr söngleiknum Avenue Q, fann fleiri lög úr söngleiknum og þau eru öll jafn góð og hrikalega fyndin :)

THE INTERNET IS FOR PORN

IF YOU WERE GAY

IT SUCKS TO BE ME

EVERYONE IS A LITTLE BIT RACIST

2008-05-19T23:32:00.002+02:00

Ég er svo inspírasjónlaus að ég hef ekki einu sinni nennt að reyna að blogga undanfarið... Fannst samt kominn tími til að láta vita að ég sé enn á lífi, sem ég er.

Ég er búin með tvö próf, bæði kammermúsík. Þau gengu bæði bara ágætlega, fékk sérstaklega góða dóma fyrir seinni daginn, en þá spiluðum ég, Ragne Marthe og Tone lítið klezmerstykki. Þó það hafi ekki verið fullkomið, þá var það alveg þarna uppi. Dómarinn hrósaði okkur sérstaklega fyrir gott jafnvægi milli radda (vorum að spila á bassa, Bb-klarinett og ess-klarinett) og að við spiluðum afskaplega vel saman, sem er jú það sem kammermúsík gengur út á :)
Næsta próf er á föstudaginn, aðalprófið meirasegja. Klarinettpróf. Ég ætla að spila lítið sólóstykki sem heitir Capriccio og er eftir Sudermeister (held að kallinn hafi heitið Henrik, en er ekki alveg viss). Það er soldið skemmtilegt stykki og er þeim skemmtilegu eiginleikum búið að þegar maður heyrir það virðist það vera ógeðslega erfitt, en það liggur svo hrikalega vel að þetta er alveg pís of keik :)

Já, svo var víst 17. maí á laugardaginn. Ég var nú alveg einstaklega löt í að taka þátt í hátíðarhöldunum. Fór að spila í skrúðgöngunni með lúðrasveit UiS (lúðrasveit sem var stofnuð 16. maí og hafði eina æfingu, algerlega án marseringa vottsóevör). Það var voðalega gaman, en að sama skapi var ég svo þreytt, kalt og illt í fótunum að ég vildi bara fara heim eftir skrúðgönguna. Fagnaði svo þjóðhátíðardeginum með að horfa á íslenskar bíómyndir :) Um að gera að nota tækifærið þegar maður er einn heima ;)

Annars er bara allt ágætt að frétta. Sumarið er horfið eitthvert annað, sólin reyndar var eftir og skín skært á hverjum degi, en hitinn er á bilinu 12-14 stig á daginn og því er ég búin að finna fram flíspeysuna á ný. Fúlt!

2008-05-12T23:36:00.003+02:00

Það er komið sumar, sólin gægist inn...
Prófin nálgast óðum og í staðinn fyrir að læra hef ég flatmagað úti í garði, því fjölskyldan á efri var ekki heima um helgina.

Svo hef ég líka, í staðinn fyrir að læra, búið mér til .mac og sett inn nokkrar myndir:
http://web.mac.com/berglind.h/Site/Upphaf.html

Spurning um að fara bara að sofa núna, í staðinn fyrir að læra...?!

2008-05-08T22:28:00.002+02:00

Í dag líður mér miklu betur... ótrúlegt hvað þetta gekk fljótt yfir, eins og ég hélt að ég væri að deyja í gær!
Var meirasegja svo í lagi í dag, að ég gat hugsað mér að eyða nokkrum klukkutímum með litlum brjálæðingum "high on summer". Var reyndar alveg búin, eftir fyrstu tvo brjálæðingana og fékk annan til að taka grúppuæfinguna fyrir mig. Sá ekki fyrir mér að ég gæti staðið í lappirnar í rúman klukkutíma, fyrst ég var alveg að leka niður eftir 40 mínútur...

Á morgun eru skipulagðar 2 æfingar, sú fyrri í 2 tíma og sú seinni í 3. Sjáum hvernig það fer...

Annars er Mette eiginlega búin að fá sparkið. Við þurfum að finna einhvern til að búa hér fyrir 1. júní, ef við finnum engan, þarf Mette að flytja út, samningurinn hennar er tímabundinn við 31. ágúst og asnakjálkinn þarna uppi er víst með 2 stelpur sem vilja flytja inn.
Fyrst að Mette þarf að flytja, þá ætla ég að segja upp mínu herbergi og finna mér annað nær skólanum. Það er alveg eins gott, fyrst að ég þarf að fá nýja meðleigjendur hvorteðer...

2008-05-07T18:12:00.002+02:00

Og núna, akkúrat þeggar ég hafði ekki tíma til að verða lasin, varð ég að sjálfsögðu lasin. Og á versta degi vikunnar, næstsíðasti spilatími annarinnar í dag... Og svo er bara svo ömurlegt að vera lasin, mér er illt í hálsinum, alveg stífluð af kvefi, lekur úr augunum á mér og ég tek 5 mínútna hnerraköst á 6 mínútna fresti. Mér er illt í hausnum og bara öllum kroppnum. Ég vil helst bara sofa og sofa, en það eru víst takmörk fyrir því.
Ohh, á svona dögum vil ég bara fara heim til pabba...

2008-05-04T22:07:00.004+02:00

Í vor ákvað einn svanakallinn á vatninu niðrí bæ, að búa til hreiður rétt fyrir aftan eitt strætóskýlið. Ég skildi nú lítið í hvað hann var alltaf að rífa upp rætur af trjánum og safna allskonar rusli, fyrr en einn daginn að það var komið myndarhreiður. Svo kom kellinginn og lagðist í hreiðrið fína og nú liggur hún þar á þrem stórum grænum eggjum. Verð að viðurkenna að ég bíð spennt eftir ungunum :)

1. maí fór upp og ofan hjá mér, vegna þess að það var frí í skólanum, ákváðum við að hafa kvartettæfingu og svo fór ég í aukapíanótíma. Hugsaði ljúft til félaga Verkalýðsmanna heima á Íslandi að marsera, þegar ég sat úti í sólinni að bíða eftir strætó. Ég fékk ekstrabónus meðan ég beið, en 1. maí er mótorhjólum hleypt á göturnar og í því tilefni voru mótorhjólakallar og kellingar með ofurflotta skrúðkeyrslu. Hún olli því reyndar að ég var of sein á æfingu, en mér fannst það allt í lagi, þetta var svo töff, hjólin og hljóðin og allt :)

Framundan er svo bissí vika, fæ vonandi hjólið mitt í vikunni, horfi þessa dagana á alla hjólreiðamenn með smá öfund í augunum, því mig langar svo út að hjóla í góða veðrinu og ekki hjálpar barnið í mér til, því þegar ég get ekki eitthvað langar mig alltaf því meira í það ;) Verður fínt að hjóla í skólann, fá smá útiveru og hreyfingu í sólinni sem spáð er næstu vikur :)

2008-04-29T21:42:00.002+02:00

Þar kom að því!

Vesen númer eitt.
búin að vera svo lítið óheppin undanfarið að það varð bara að koma eitthvað stórt... Hjólaði í skólann í gær og var á hausnum nær alla leiðina, því keðjan er alveg komin í klessu, flæktist einhvern veginn um sjálfa sig eða eitthvað annað. Svo að ég fór með hjólið inn á verkstæði og fékk að vita í dag að það þarf að skipta um allt heila draslið, keðjuna og kringum það, bremsurnar og eitthvað sem ég man ekki eftir nánast allt sem getur ryðgað er ryðgað í drasl. Að skipta um draslið kostar minnst 1500 kall (norskar).
Svo nú er spurningin, á ég að kaupa mér nýtt hjól eða láta gera við?! Bæði er jafn ömurlegur kostur, ef ég læt gera við, verður þetta kannski orðið svona aftur eftir ár... Svo ef ég kaupi nýtt, erum við að tala um ca 3000 kr, fyrir ágætt hjól og hver veit hvort það fari eitthvað betur...

Vesen númer tvö.
Sá sem ég leigi af herbergið, er líklegast að henda okkur út. Allavega Mette. Hún ætlaði að láta hann vita að hún vildi vera áfram eftir að samningurinn hennar rynni út í júní og þá svaraði gaurinn að hún gæti fengið að vera áfram EF hún fyndi einhvern annan til að búa hér! Enn hefur hann ekkert sagt við mig (var enginn heima áðan) þannig að ég veit eiginlega ekki hvort ég hafi einhvern stað til að búa á í haust eða ekki :S

Svo gaman að vera ég...

2008-04-24T23:28:00.002+02:00

Þá er ég komin heim aftur... Ætla ekki einu sinni að segja frá því hvernig tókst að komast hingað, það gekk svo vel að ég efast um að nokkur muni trúa mér!

Gerði fullt heima, fór á árshátíð hjá LV, sá litlu sys keppa á sundmóti, passaði Laugateigsbörnin nokkrum sinnum og fór á foreldrafund hjá skátunum. Ætlaði að gera fullt fleira, en alltof stuttur tími, eins og venjulega ;)

Nú tekur við hálfbrjálað tímabil fram til 12. júní, ritgerðir og próf. Planið er að vera búin að öllu 20. maí, til að geta eytt sem mestum tíma á ströndinni ;) Sjáum til hvernig þetta gengur...

Annars gekk ég inn í sumarið þegar ég kom útum dyrnar á Sola flugvelli. Hér er um 15 gráður á daginn, sól og veðurdagsins blíða. Dýrindis veður alveg hreint og fátt yndislegra en að koma út í hlýja goluna. Eina sem skemmir fyrir mér, eru bændurnir hérna hinumegin við götuna (þeir sem ekki vita, þá eru bóndabæir í hrönnum hér nokkra metra í burtu), eru í óða önn að dreifa skít á túnin, með tilheyrandi lykt! Á meðan er varla líft utan dyra í nágrenninu og maður vogar sér ekki að opna glugga...

En ég hef svosem lítið að segja bara, en þú?!

2008-04-11T00:25:00.002+02:00

Svona til að öppdeita þá sem ekki vita, þá skrapp ég í fluvvél um síðustu helgi og flaug heim á Frón :) Var nú búin að plana það alveg síðan í janúar (þetta er páskafrí), en það átti að koma Elísabetu á óvart (það tókst!) og mátti enginn vita neitt ;)
Þar sem enginn vissi að ég yrði á ferðinni, þá var ekki búið að láta örlagaguðina vita og gengu flugferðirnar tvær bara svona ljómandi vel, engin seinkun, báðar vélarnar meirasegja of fljótar!

Síðan ég kom heim, er ég búin að gera alveg helling, afmæli og snatterí. Reddaði pabba stöð 2 í gegnum skjáinn og búin að hengja upp auglýsingar um klarinett til sölu alveg útum allt land (eða frá Selfossi suður í Kópavog). Best að segja það líka hér, ef einhvern langar í. Ég ætla að selja gamla klarinettið mitt, áhugasamir hafi samband við mig.

Ég á líka eftir að gera helling, fara í klippingu og svo er búið að troða mér inn á árshátíð hjá Verkalýðnum, sem er á laugardaginn... Um helgina ætlar Elísabet að vera með Sólargeislann, Engilinn og prinsessuna í heimsókn hér fyrir austan, verður fjör þá :)

En þið skuluð ekki búast við miklu bloggi næstu vikuna, netþörfin mín dettur alveg niður í ekki neitt, þegar ég er hér heima hjá pabba mínum ;)

2008-04-03T22:43:00.003+02:00

Vikan rétt að byrja og það er að koma helgi! Hvað er í gangi eiginlega, af hverju líður tíminn svona hratt?!
Ég er orðin svo dugleg í að skila, (öllu nema hljómfræðiverkefnum) í dag skilaði ég inn lista yfir það sem ég hef spilað í vetur, í samspili og á píanó. Á morgun ætla ég að senda af stað í skil pappíra um að ég sé í skóla í Noregi og að ég hafi engar tekjur og svo er planið að vera dugleg í hljómfræði um helgina og skila einhverjum varíasjónum vonandi fullgerðum á mánudaginn. Ekki að ég muni ekki fá það í hausinn, með "allt vitlaust", við Svein hljómfræðikennari erum nefnilega soldið ósammála um hvað er flott og hvað ekki ;) meina, þegar hann segir, nú megið þið gera eins og ykkur langar, og svo gerir maður það og samt getur maður fengið villur... Fussum svei, segi ég nú bara!

Annars er nú lítið að frétta, vorið svona kemur og fer. Það var td rosalega flott vor á mánudaginn, en á þriðjudaginn var hörkuvetur, með roki og rigningu. Það eina sem hélt manni frá því að hoppa bara í sjóinn, var hversu gaman það var að fylgjast með öllu vitlausa fólkinu berjast við regnhlífina sína í rokinu :) Skil aldrei hvernig fólki dettur í hug að taka með sér regnhlíf þegar regnið kemur á hlið... Heimsku útlendingar!

ef einhvern langar að skrifa ritgerð fyrir mig, um notkun klassískra og rómantískra mótíva í klarinettsónötum Brahms, má hinn sami hafa samband við mig sem fyrst!

2008-03-30T23:08:00.002+02:00

Mig dreymdi svo asnalegan og fyndinn draum í nótt, verð bara að deila honum með ykkur.
Ég var stödd á Eurovision, lokakeppninni, og einhverra hluta vegna var bara ákveðið að ég myndi syngja fyrir Íslands hönd. Ég, alveg afskaplega ligeglad, bara "jújú, nó problemmó" og fékk blað með laginu og textanum og daginn eftir var keppnin. Ég fór bara án þess að líta á blaðið og kem svo daginn eftir, algerlega óæfð, en alveg pottþétt á því að ég muni komast í gegnum þetta. Tók bara blaðið með mér á sviðið og lagði það á skólapúlt sem var á sviðinu. Þetta var alls ekki neitt extravagant eða stór keppni eins og eurovision er í raunveruleikanum, bara svona meðalstórt svið og jú, soldið mikið af fólki.
Svo rétt áður en ég átti að fara á svið, fór ég aðeins að sjá eftir að hafa ekki skoðað blaðið og æft mig aðeins, en dríf mig bara út á svið og staulast í gegnum lagið. Var með einhvern risamíkrafón fastann á hausnum (svona eins og þeir eru oft með í sjónvarpinu, þegar þeir eru að dansa og þannig líka, nema í staðinn fyrir að þetta var bara svona pinni, þá var alveg risakúla) og lifi mig þvílíkt inn í þetta enda alveg með hendurnar á uppsveiflu með löngum síðasta tón og þvílíkt drama og læti.
Og svo man ég ekki meir... Spurning hvort þetta þýði eitthvað?!

Annars er ég nýkomin heim af tónleikum. Þeir gengu vel og voru bara allt í lagi. Reyndar svo hrikalega heitt að ég þurfti að draga hljóðfærið um 1 cm í sundur til þess að stemma, en venjulega dreg ég ekkert út (fyrir óvita, þá er 1 cm geðveikt mikið).
Mér finnst alltaf jafn flott og merkilegt að sjá alvöru píanóleikara spila. Það voru 2 píanókonsertar á prógramminu, Mozart og Tchaikovskí. Ég bara skil ekki hvernig stelpurnar geta hreyft fingurna svona hratt og hvað þá að spila svona margar nótur í einu! Vidunderligt alveg!

Nú tekur svo bara við skóli, verkefnavikum er lokið og óbreyttur skóli alveg fram í lokaviku maímánaðar. Fyndið þegar maður er orðinn vanur að vera alltaf með þessar verkefnavikur, þá virðast 2 mánuðir af venjulegum tímum alveg rosalega langur tími ;) er ekki að sjá fyrir endann á þessu bara... Þó verður nóg að gera, þarf að klára eitt hljómfræðiverkefni, byrja á öðru og klára það og svo þarf ég að skrifa ritgerð fyrir tónlistarsögu, sem mér finnst voðalega stórt og erfitt verkefni... En við sleppum við prófið :) Þurfum bara að taka próf í hljómfræði og tónheyrn, munnlegt og skriflegt þar... Svo eru einir tónleikar með Befriad 12. júní (takið daginn frá, ef þið komið í heimsókn, þá lofa ég sko frábæru veðri :) og vonandi heimferð þann 13. Sem er föstudagur...

2008-03-26T23:13:00.003+01:00

Hér ríkja þvílíkar vetrarhörkur, hitinn er rétt yfir frostmarki og enn er snjór, en sólin er nú samt farin að vinna aðeins í þessu... Mér finnst þetta ekkert gaman, ekki einu sinni ef þó ég kæmist á skíði, á skíðasvæðinu í Sirdal er nefnilega 16 gráðu frost!! Fussumsvei, sko!

Þessa vikuna er verkefnavika í skólanum. Það þýðir engir venjulegir tímar, bara hljómsveitaræfingar frá ca 10-14. Nema á föstudaginn, þá erum við á æfingu frá 18-21. Prógrammið fyrir tónleikana einkennist af sólókonsertum og stykkjum. Sem er eiginlega alveg ferlega leiðinlegt, því sólóstykki byggjast auðvitað mest upp á að sólistinn spili af sér rassgatið á meðan hljómsveitin leikur léttan undirleik... Ég er með A-klarinett í láni þessa dagana, er að spá í að kaupa það og er því með það í svona prufuláni... Veit ekki alveg hvað mér finnst ennþá, það er mjög létt og þægilegt að spila á það, en það kemur fyrir að það kemur svona leiðindasónn á nokkrum nótum. Svo er það líka týpan fyrir neðan B-klarinettið mitt í gæðum. En kostirnir eru að ég get fengið það núna, en ef ég ætlaði að kaupa mér nýtt, yrði það ekki fyrr en í haust, í fyrsta lagi... Ohh, ég er svo léleg að taka ákvarðanir ;)

2008-03-25T16:32:00.002+01:00

Veit ekki hverskonar ruglveðurguðir eru að leysa hér af, en það mætti nú alveg taka aðeins í rassgatið á þeim og segja svona gerir maður ekki!

Síðustu 2 vikur hefur verið alveg hreint yndislegt veður hér í útlandinu, með sól og um og yfir 10 stiga hita. Það passaði alveg við árstíðina hér, vorið kemur yfirleitt um miðjan mars og svo verður það bara betra og betra þar til sumarið kemur í byrjun maí. Svo öllum til mikillar undrunar byrjaði bara allt í einu að snjóa á sunnudagskvöldið. Og ekki hvarf snjórinn, eins og hann er vanur að gera, nei, hann var sko hér í allan gær og svo þegar ég kom út í morgun, snjóaði ennþá meira. Og það bara snjóaði og snjóaði alveg fram yfir hádegi! Ég hef sko aldrei séð svona mikinn snjó hérna áður... Enda fór líka allt í klessu, strætó var bara lokað, því þeir runnu bara á næstu bíla, byrjuðu ekki að keyra aftur fyrr en um þrem tímum seinna. Og hver var niðrí bæ, að bíða eftir strætó til að skjótast aðeins heim?! Jú, auðvitað ég. En á endanum komst ég þó heim og er núna alvarlega að spá í að nenna ekki niðreftir aftur, leti vegna veðurs... Er það ekki lögleg afsökun?! Ég bara nenn'ess'ekki!

2008-03-23T14:19:00.001+01:00

Allur varinn er góður!

Gleðilega páska :)

2008-03-23T02:06:00.003+01:00

Var að horfa á Animal Planet með einu auga og í tölvunni með hinu. Svo skyndilega byrjaði fólkið í sjónvarpinu að tala við mig, bara prívat og persónulega!
Þetta var eitthvað svona innskot, stelpa að segja frá pysjudæminu í Eyjum. Hún talaði íslensku og ég auðvitað hélt að hún væri að tala við mig, þar sem ég heyri ekki íslensku, nema verið sé að tala við mig ;)

2008-03-14T21:31:00.002+01:00

Nú er ég búin að vera 26 í alveg þónokkra daga. Mér finnst ég samt ekkert hafa elst eða stækkað eða breyst á neinn hátt. Ekki svona eins og ákveðin frænka sem stækkaði um einhverja sentimetra einu sinni nóttina fyrir afmælisdaginn sinn :)

Helstu fréttir eru þær að jors trúlí sjónvarpsfíkill er kominn með billjón sjónvarspstöðvar :) Einhverjir snillingar ákváðu nefnilega að fyrst stafrænt sjónvarp væri komið til Noregs (gerðist í ca október nóvember á síðasta ári) að fólk hefði enga þörf fyrir venjulegt sjónvarp. Því var köttað á venjulegar sjónvarpsútsendingar í Rogaland 4. mars, allt nema TVNorge þeas. þeir ætla að halda áfram til 15. apríl.
Það tók mig eina viku að verða biluð á hversu ömurlegt TVNorge er orðið og fékk samþykki Mette og Therese um að fá digital boxið. Fór í dag og fjárfesti í svoleiðis grip og setti það upp. Alveg sjálf. Sem er eitthvað sem pabbi þorði ekki að gera. Hí á hann :)
Nú sit ég afskaplega ánægð og glöð fyrir framan sjónvarpið. Að horfa á TVNorge. Kaldhæðnislegt?!

Svo er komið páskafrí. Og vor. 12 stiga hiti og sól í dag. Stundum elska ég bara að búa í útlöndum :)

2008-03-10T22:33:00.002+01:00

Já, ég á víst afmæli í dag...
Það tók mig um 2 klukkutíma að muna eftir því og hefði líklegast tekið lengri tíma ef ég hefði ekki verið í skólanum að skrifa glósur... (sem ég dagset alltaf)

Að nær öllu leyti hefur dagurinn verið alveg voðalega eins og allir aðrir dagar. Skóli, æfði mig smá, kenndi aukatíma (tók smá þjófstart á páskaeggjaát í einum tíma) og fór á bókasafnið að reyna að finna eitthvað um Brahms. Þarf nefnilega að henda saman drögum að ritgerð fyrir miðvikudaginn...

Síðasta vika með umliggjandi helgum hafa verið annasamar, setti inn smá dagbók frá Voss-námskeiðinu, sem var alveg með eindæmum skemmtilegt, aðeins of mikill dans kannski en annars alveg fryktelig morsomt :)
Svo kenndi ég á námskeiði í Orre, sem er í Bryne, en lúðrasveitin á námskeiðinu er frá Klepp. Stjórnandinn hins vegar er frá Panama. Það var eiginlega frekar skemmtilegt, afslappað og rólegt bara. Frábært að fá svona fullt af pening fyrir eitthvað sem er bara skemmtilegt...
Annað sem er bara skemmtilegt er Befriad dæmið. Erum núna búin að hafa tvenna tónleika, eina í Egersund þarsíðasta sunnudag og eina í Jørpeland síðasta sunnudag. Egersund kirkja var alveg ponsulítil, sátum alveg eins og rækjur í hljómsveitinni. Ein gömul kona reis upp eftir tónleikana og sagðist viss um að ef við myndum ferðast um heiminn og spila söngleikinn þá myndu öll stríð leysast. Ég er henni alveg sammála og vil ólm reyna :) alltaf gaman að ferðast allavega ;)
Kirkjan í Jørpeland var öllu stærri. Hún er gerð úr steypu og engu, á greinilega að vera eitthvað voða listaverk, en fyrir smiðsdótturina mig, sá hún alveg hrikalega hálfkláruð út, bara ber steypa með förunum eftir spýturnar. Altaristaflan þar var sú hrikalegasta sem ég hef séð, Jesú á krossinum, úr einhvers konar málmi, en Jesús greyið leit meira út eins og svona skerímúví beinagrind...
En tónleikarnir voru góðir, nánast full kirkja (stór kirkja!), svo vel mætt að það er búið að bóka ekstra tónleika kl 9 á annan páskadag. Allir stóðu upp og sungu með meirasegja í aukalaginu :)
Held að þetta sé alveg að gera sig, núna er búið að bóka aukatónleika á annan páskadag og svo er búið að panta tónleika 12 júní. Kannski að ég hafi bráðum efni á að kaupa mér A-klarinett :)

2008-03-10T20:45:00.004+01:00

DAGUR 1 – Ferðalag og dans
…Byrjaði snemma. Virkilega snemma! Ég vaknaði um 4.30 og kláraði að pakka niður. Rétt náði að loka töskunni, var samt nokkuð stolt fyrir að hafa getað troðið 5 daga ferðalagi í litlu töskuna.
Þar sem strætó byrjar ekki að ganga fyrr en 7 í Stavanger, ákvað ég að labba bara í flugrútuna. Heiman frá mér og niðrá næstu stoppistöð er ca 1 kílómeter. Niður bratta brekku. Gangan var því afar hressandi, svona í morgunsárið. Bara gott að það var ekki upp brekkuna.
Framan af gekk ferðalagið til Voss bara vel, náði flugrútunni, flugið fór næstum því á réttum tíma og lenti um korteri of snemma í Bergen. Og þá kom dynkurinn. Ég hafði rosalega tæpan tíma til að komast inn til Bergen, en samkvæmt töflu flugrútunnar átti ég alveg að ná lestinni. Þegar rútan var komin af stað fattaði ég, að taflan gildir alveg örugglega ekki mitt í umferðarálagstíma. Sem reyndist rétt. Ég fór út úr rútunni í Bergen á sömu mínútu og lestin lagði af stað. Næsta lest átti að fara um 2 tímum seinna, sem gaf mér tíma til þess að finna pósthús og fá mér að borða. Öll lestarvesensfýla hvarf um leið og ég labbaði inn í verslanamiðstöðina við hliðina á lestarstöðinni. Það fyrsta sem ég sá var lítið Baker Brun bakarí (besta bakaríið í öllum Noregi!). Svo ég settist bara þar inn með kakó og sólskinsbollu og las Tommy & Tigern.
Ég náði svo næstu lest, sem rann inn til Voss um hálftólf leytið.
Voss er úberkjút lítill skíðabær. Ég fékk götukort á lestarstöðinni svo ég gæti fundið leiðina í Ole Bull skólann. Ég var næstum búin að gefast upp þegar ég sá hversu langt var á
milli x-anna á kortinu, en labbaði af stað. Ég var búin að taka ca 3 skref þegar ég kom að kirkjunni, sem þýddi að ég var ca hálfnuð. Jú, Voss er lítill bær. Fann skólann og komst inn og allt. Stóð eins og bjáni í anddyrinu, því þar var enginn og ég heyrði ekkert hljóð. Svo kom kall og spurði hvort ég væri íslendingurinn. Jú, ég er víst íslendingurinn.
Og nú er ég farin að dansa.

Mörgum klukkutímum (og hringjum) seinna...
Við erum búin að dansa svo til í allan dag. Byrjuðum á að læra hringdans og eins og nafnið gefur til kynna, er dansað í hring. Stóran hring kringum salinn og lítinn hring kringum sjálfan sig. Eftir nokkra hringi var ég orðin ansi ringluð og eftir nokkra klukkutíma stóð ég varla í lappirnar.
Næst var kynning á ýmsum blásturshljóðfærum. Þar var td svona langt langt horn, minna horn og svo flautur. Öll byggjast þau upp á yfirblæstri. Eftir kynninguna fengum við að prufa öll hljóðfærin og það var nokkuð sérstakt. Þá komu yfirblástursæfingarnar hennar Áshildar að gagni :)

Svo eftir kvöldmat, var komið að bygdedans, sem við lærðum fljótt að er líka hringdans, bara möööörg mismunandi skref. Og fleiri hringir. Í endann lærðum við polka, í mýflugumynd. Þar voru sömu hringirnir og nú, í þessum skrifuðu orðum, langar mig helst að setjast niður inni á baðherbergi og kynnast klósettskálinni náið. Er með gubbuna alveg upp í háls.

2008-03-10T19:33:00.004+01:00

DAGUR 2 -Dans
Þegar ég vaknaði í morgun, lá eitthvað hvítt á trjánum fyrir utan gluggann minn. Það hefur semsagt snjóað í nótt. Allt er voðalega hvítt og fallegt, og mig langar ennþá meira á skíði en áður. En það er víst ekki hægt, því skíðasvæðið lokar um leið og við erum búin á námskeiðinu á morgun.
Dagurinn í dag hefur einkennst af hreyfingu. Reyndar var byrjað á því að einhver gaur hélt fyrirlesturinn “Hvað er þjóðlagatónlist?”. Sá maður var ekkert hrikalega hress og þar sem kvöldið í gær teygði sig vel inn í nóttina, var ég ekkert rosalega vakandi. Eftir fyrirlesturinn fórum við að skoða gömul hús hér uppí fjalli. Fallegi snjórinn gerði ekkert svakalega auðvelt fyrir og brekkurnar þannig að ef maður myndi renna af stað, þá myndi maður ekki stoppa fyrr en þónokkrum hundruð metrum neðar. Ef maður klessti ekki á tré, það er að segja. En öll komumst við nú upp á endanum og fengum leiðsögn um íbúðarhúsið og fjósið. Svo þurftum við að koma okkur niður aftur, eitthvað sem ég kveið fyrir, en svo kom í ljós að það liggur venjulegur vegur þarna uppeftir, kennurunum fannst bara svo gaman að láta okkur labba aðeins utan vegar!
Eftir hádegi var söngfyrirlestur og svo tók við meiri dans. Og meiri dans. Og meiri dans. Veit ekki hvað það er, en allir þessir dansar virðast byggjast upp á að snúa sér í hring og ég, sem verð alltaf sjóveik og bílveik og ringluð um leið, er ekki alveg að höndla alla þessa hringi. Munaði minnstu að ég þurfti að hlaupa fram og æla eftir eina ferðina.
Nú er smá pása og hvaðtekur við?! Jú, meiri dans!

2008-03-10T19:31:00.003+01:00

DAGUR 3 – Meiri dans, meiri dans, meiri dans
Nú er sko komið fokkings nóg af öllum þessum fokkings dansi! Nei, ok, djók, en fyrr má nú aldeilis fyrr vera að það á að láta mann dansa. Í dag þurftum við reyndar bara að endurtaka það sem við höfum lært, og það var bara einn tími með dansi, í stað tæpra 3 hina dagana. En guð, hvað ég er komið með leið á þessum hringsnúningi.

Prógrammið í dag var aðeins meira praktískt, við fengum einn tíma í söng, lærðum nokkur þjóðlög og að “skreyta” lagið með smá svona trillum og þannig. Svo var fyrirlestur um notkun venjulegra fiðlna i þjóðlagatónlist. Nú langar mig hrikalega að taka upp fiðluna og fara að æfa mig. Eftir hádegi var haldið áfram með fiðlurnar og svo fengum við alltof stuttan tíma í að læra að spila þjóðlög á okkar eigin hljóðfæri. Það er eiginlega það skemmtilegasta sem við höfum gert að mínu mati. mál. Svo tók við meiri fokkings dans, og eftir þann tíma er bara frí þangað til á morgun.
Hér er búið að snjóa í allan dag, svo langt síðan að ég hef séð svona jafna snjókomu, gæti horft endalaust bara út um gluggann. Spurning um að fara í smá göngutúr á eftir...

2008-03-10T19:27:00.003+01:00

DAGUR 4 – og enn var dansað
Ótrúlegt en satt, þá gat ég alveg staðið upp og labbað niður stigana án mikilla vandkvæða í morgun. Það er eins og hnén hafi komist að því að það er ekki til mikils að kvarta, þau þurfa í gegnum allt þetta hopp likevel. Við byrjuðum þar sem frá var horfið í morgun við að læra að spila þjóðlög. Lærðum það sem ég held að sé hallander og alveg jafn hrikalega skemmtilegt og hitt (sem var kannski reilander). Svo var komið að því að læra um þjóðdansana, söguna og svoleiðis, sungum við smá meira og lærðum um söng. Eftir hádegi var meira sungið og svo fórum við á tónleika í sætu litlu húsi, sem er til minningar um Ole Bull og fleiri fiðlukalla og tónskáld.
Svo var komið að því. Um kvöldið var “alvöru” kveldsete, með ekta spelemann undirspili og við fengum heila 7 fiðlukalla og eina fiðlustelpu. Sem var svona 15 ára. Hún lækkaði meðalaldurinn allavega um 30 ár.
Dansinn gekk bara furðulega vel og fljótt fyrir sig og nú þarf ég aldrei að dansa meir. Nema bara á morgun

2008-03-10T19:23:00.003+01:00

DAGUR 5-Nó mor fokkings dans!

Síðasti dagurinn og fer að líða að heimferð. Eftir morgunmat eyddi ég smá tíma (og miklum peningum) í búðinni í skólanum. Keypti nokkrar bækur og geisladiska, ásamt einni seljefløyte (þið heima, ef ykkur fannst blokkflauta pirrandi, bíðið þar til þið heyrið í þessarri!). Sú flauta er reyndar bara úr plasti, en plön standa til um að smíða eina ekta úr íslensku tré, með hjálp pabba :)
Í dag fengum við í heimsókn harmonikkuleikara, sem hefur samið talsvert mikið af þjóðlagatónlist og útsett fyrir ýmis samspil og dót. Fengum að heyra eitt lag, sem hann útsetti fyrir harmonikku, hardingfiðlu, seljefløyte, söngkonu og sinfóníuhljómsveit. Það var alveg hrikalega flott og fallegt. Er alveg voðalega hrifin af sönglögum sem innhalda engan texta, bara siridiriramarei og þannig, en þetta var eitt svoleiðis.
Eftir það var bara smá samandrag og hvar við getum fundið þjóðlagatónlist og allt um hana á netinu. Svo bara dreif maður sig út og inn í lest og svo flug í kvöld, hjem til Stavanger.
Næst á dagskrá er að setjast við lestur og æfingar, fiðlan bíður heima á Íslandi (mikið sé ég núna eftir að hafa farið með hana heim síðasta sumar!) og svo vinna í lottóinu eða eitthvað, og kaupa hardingfele og læra á hana... Hardingfiðlur eru nefnilega úberkúlasta hljóðfærið bara evvör!

2008-02-29T21:36:00.003+01:00

Vissir þú...

...að það er hlaupársdagur fjórða hvert ár? Jú, það vissirðu líklegast
...en að það er ekki hlaupár á heilu árhundraði, (eins og 1700, 1800, 1900, 2000 osfrv.) nema að það sé hægt að deila tölunni með 400? Já, þessu komst ég að í dag...
Það var td hlaupár árið 2000 (2000/400=5) en það verður ekki árið 2100 (2100/4=5.25). Þessu komst ég að í dag...svo lengi lærir sem lifir, ha?!

2008-02-28T22:24:00.002+01:00

Það alveg hlaðast inn verkefnin þessa dagana. Það er jú alltaf þannig að annaðhvort hef ég ekkert að gera eða allt...
Nú hljómar dagskráin næstu einu og hálfu vikuna þannig:
Á morgun er ég með grúppuæfingu klarinettanna í litlu lúðrasveitinni í Madlamark.
Laugardagur: Ætla að fara í smá Ikea leiðangur, er orðin svo þreytt á því að hafa allt í drasli, ætla að finna einhverjar hillur/skúffur.
Sunnudagur: Befriad æfing og tónleikar í Egersund
Mánudagur-Föstudagur: Námskeið í Voss, dagskráin er komin og hún er frá níu til níu flesta dagana!
Laugardagur: Kenna á námskeiði í Bryne
Sunnudagur: Befriad tónleikar í Jørpeland
Næsti frídagur hjá mér verður því líklegast 14. mars :)

2008-02-26T23:44:00.002+01:00

Það var sko alveg maraþonæfing í gær í þessu dæmi þarna. Verkið heitir Befriad og er ósviðsettur söngleikur úr Jóhannesarguðspjalli og með Jesú og Jóhannesi og einhverjum fleirum... Semsagt lítil hljómsveit, húdsj stór kór og nokkrir einsöngvarar. Þetta er alveg ágætis stykki, skemmtilegar laglínur og alls ekki erfitt, en samt ekkert of létt, svo að manni hundleiðist.
Næsta sunnudag verður líklegast önnur svona maraþonæfing, nema að sú æfing endar á tónleikum. Daginn eftir á ég flug til Bergen kl 7. Þá tekur við námskeið fram til föstudags og á laugardaginn er ég að fara að kenna á skólalúðrasveitarnámskeiði í Bryne. Held að ég hafi ekki verið svona bissí síðan síðasta veturinn á Íslandi.

Annars er vorið komið hér í útlandinu.Fyrir helgi kom smá sól og fínt veður og gróðurinn tók heldur betur við sér, alls staðar sér maður túlípana og vorlauka, trén eru farin að laufgast og á þeim grasflötum sem grasið aksjúallí fölnar, eru komin lítil græn strá. Ó, hvað ég væri til í að fá vorið bara núna, og sumarið á morgun!

2008-02-19T23:37:00.005+01:00

Fleiri fyndnar auglýsingar :)
Frá Opplysningen 1881, sem er eins og 118 á Íslandi.

Þýðing:
Kona: Upplýsingar 1881.
Kall: Já, halló, góðan dag. Hversu mikið kostar einn lestarmiði frá Lilleström til Osló?
Kona: Jú, það skal ég finna fyrir þig. Hann kostar 49 krónur.
Kall: 49 krónur, já. Úff. Hversu langt kemst ég fyrir 28? Aha. Ok. Takk. Bless.
Texti: Við getum hjálpað þér með næstum allt.

Þýðing:
Kona: Upplýsingar 1881.
Kall: Já, hérna, hvernig segir maður fyrirgefðu á þýsku?
Kona: Fyrirgefðu á þýsku? Það skal ég athuga. Það er entschuldigung.
Kall:Entschuldigung! Hvað heitir ég er með tryggingaskýrslu á þýsku?
Kona: Ich habe skadenbericht.
Kall: Ich habe skadenbericht!!
Texti: Við getum hjálpað þér með næstum því allt.

2008-02-17T00:30:00.002+01:00

Stundum er ég bara alveg stútfull af góðum hugmyndum...
Í dag datt mér í hug að hjóla í skólann, því það var svo fínt veður. Sem ég gerði og æfði mig í nokkra tíma. Svo kom að því að hjóla heim, en ég ákvað að stoppa niðrí bæ og kaupa mér eitthvað gott að borða. Ég hélt að ég myndi alveg rata úr bænum og heim, meina, en neinei, það gerði ég sko ekki. Hjólaði þá leið sem ég hélt að væri leiðin inn á Madlaveien, en svo reyndist sko heldur betur ekki. Lenti inní einhverju hverfi og það tók sko heila eilífð að finna leiðina út úr því aftur. Þegar ég loksins komst út á einhverja stóra götu, þá var ég orðin svo villt að ég vissi ekki hvort ég ætti að fara til hægri eða vinstri til að komast til heim. Ákvað að fara til vinstri en þegar ég var búin að hjóla í ca 5 mínútur, komst ég að því að þetta var sennilega vitlaus átt, svo ég sneri við og hjólaði til baka. Eftir um korter í þá átt, fann ég loksins eitthvað sem ég kannaðist við, hverfi með dularfullum ofurlitlum húsum og litlum görðum, sem er neðst í bakkanum upp á Hauginn. Þá var bara eftir að hjóla upp bakkann, sem er sko laaangur og brattur, en svo var ég komin heim. Og í staðinn fyrir að vera um hálftíma á leiðinni, var ég alveg góðan klukkutíma...
En yfirleitt læri ég eitthvað af mínum slæmu ákvörðunum, eins og til dæmis að það er ekki góð hugmynd að prufa nýja leið í myrkri og að bleyjubuxurnar hans Örvars eru sko alls ekkert slæm hugmynd!

2008-02-15T19:06:00.004+01:00

Það er svo mikill sunnudagur í mér eitthvað að ég á örugglega eftir að mæta í skólann í fyrramálið...

Annars fékk ég eitt af þessum skemmtilegu símtölum í dag. Veit ekki hvernig eða hvar þetta fólk fær símanúmerið mitt, en ég fæ annað slagið svona símtöl. Þá hringir bara eitthvað fólk í mig, alveg út í bláinn og biður mig að vera með í hinu og þessu verkefni. Fékk td. djobbið í Madlamark Skolekorps á þennan máta og það kom nú vel út.
En já, að þessu símtali. Í þetta skiptið var það einhver gaur sem bað mig um að vera með í einhverju úberverkefni. Þetta eru semsagt 2 heilsdagsæfingar og 4 tónleikar, með 80-90 manna kór og sinfóníuhljómsveit. Geðveikt spennandi! Og enn betra, söngvararnir borga um 5000 kall, til þess að hljómsveitin fái borgað :) ég fæ semsagt borgað fyrir þetta, um 50 þúsund kall :) Var sko ekki lengi að segja já!

2008-02-14T21:28:00.002+01:00

Alveg frábært :)

2008-02-14T10:07:00.002+01:00

Kræ-Beibí?
Í alvörunni?!

2008-02-13T19:16:00.004+01:00

Þessi skóli sem ég er í, er rosalega góður í að koma manni á óvart.
Á sunnudaginn td. fengum við smá surprise, þegar einhver sá á skjánum (sjónvarp á nokkrum stöðum í skólanum, sýnir tilkynningar frá skrifstofunni og svoleiðis) að við á 2. ári áttum að mæta á tónleika í Eiganes Skole daginn eftir. Það kom okkur nokkuð á óvart, þar sem enginn hafði heyrt neitt um þessa tónleika, um hvað þeir væru eða af hverju við ættum að mæta. Já, eða hvar Eiganes Skole var. En við fundum út úr því og rétt fyrir tólf voru um 10 mjög svo ráðvilltir nemar sem reikuðu um á leikvellinum við Eiganes Skole að reyna að finna út úr því hvert húsanna við ættum að fara inn í. En einn lítill strákur skipti á upplýsingum við mig og benti mér á rétta húsið. Ég reimaði skóna hans í staðinn.

Fengum svo aftur sörpræs í dag, en það var öðruvísi og frekar þægilegt sörpræs, nefnilega upplýsingar fyrirfram. Lise, annar tónlistarsögukennarinn kom í tónlistarsögutíma hjá hinum tónlistarsögukennaranum með upplýsingar um þjóðlaganámskeiðið í Voss. Svo að núna vitum við svona nokkurn veginn hvað við erum að fara út í, alveg með þirggja vikna fyrirvara! Nokkuð gott, þykir mér.
En við eigum helst að koma á sunnudeginum og verðum fram á föstudag. Við eigum að taka með okkur hlý föt og regnföt, því þarna er víst allra veðra von á einni viku. Svo eigum við að taka með okkur sleipa skó (sveiattan, ég er varla búin að leysa ein skóvandamál, þegar þau næstu taka við) fyrir allan dansinn sem þarna fer fram (sem er sko þokkalega annað sveiattan!).
Við fáum fullt að borða, en þurfum að taka með okkur matpakka í morgunmatnum, til þess að borða í hádeginu. Veit ekki alveg af hverju, en ég fékk alveg hroll með tilhugsun til Toneheim og gúmmíbrauðsins þar, þegar hún minntist á matpakka. Var alveg komin út í búð í huganum að kaupa kex og ávexti og þess háttar, líkt og ég gerði síðustu mánuðina þar...
En fyrir utan hvað þetta er dýrt og fyrst að skólinn skyldar okkur til að fara, finnst mér svo að skólinn ætti líka að borga, þá verður þetta örugglega voða gaman.

2008-02-10T22:51:00.000+01:00

Þá er verkefnavikunni lokið og venjulegur skóli hefst á ný. Eða svoleiðis, á morgun eigum við á 2. ári að mæta á einhverja dularfulla tónleika í Eiganes skóla, voðalega lítið vitað um þá. En svo er bara venjulegur skóli alveg næstu 3 vikurnar, þá er það túrinn til Voss á þjóðlaganámskeið. Sem þýðir kannski að ég komist á skíði í fyrsta sinn síðan ég var 16 ára (sem er eftir 4 ár að mati eins strætóbílstjóra).
En verkefnavikan var bara fín. Við spiluðum á Shellpris tónleikunum (Shellprisen eru einskonar verðlaun fyrir að vera góður tónlistarmaður), spiluðum Overture Candide af Bernstein og svo nokkrar aríur með söngvurum sem hafa fengið Shellprisen einhvern tímann.
Klarinettdeildin fékk smá púsluspil að leysa, þegar bassaklarinettuleikarinn (Tone, sem er sko efni í heilt blogg einhvern tímann!) fékk svona líka svakalega flensu á föstudaginn og Srdjan, sem var skilinn útundan, átti að leysa af. En hann reyndist ekki nógu góður á bassann, svo að hann tók við 1. klarinettinu af Tore, sem spilaði bassaröddina í þeim verkum sem innihéldu bassarödd.
Svo kom það í ljós á æfingunni í morgun, að Srdjan var ekkert reddí til að spila Glitter and be gay, svo að úr fór að ég fékk nýtt sóló úr 1. röddinni á meðan Tore spilaði bassaklarinett (þetta var ákveðið tveim tímum fyrir tónleika, eftir síðustu æfinguna og ég þurfti að spila það á tónleikunum, algerlega án þess að hafa spilað það áður OG það samanstóð af áttundapartsnótum, tríólu og sextándapartsnótum, sem er ekki alveg það auðveldasta). Og svo ég monti mig svolítið, þá tókst mér það, spilaði líka svona glimrandi vel og uppskar hrós frá öllum í kringum mig og frá Håkon, kennaranum mínum, sem er auðvitað best í heimi fyrir tónlistarnemann. Fátt gefur manni meira en hrós frá kennaranum :)